پہلی بار دل کی بے ترتیبی کے علاج کیلئے جدید ٹیکنالوجی متعارف

کراچی: پاکستان میں پہلی بار بچوں میں دل کی دھڑکن کی بے ترتیبی (Arrhythmia) کے علاج کے لیے جدید ترین ٹیکنالوجی متعارف کرا دی گئی ہے۔ کراچی کے سرکاری ہسپتال، نیشنل انسٹی ٹیوٹ آف کارڈیو ویسکولر ڈیزیز (NICVD) میں اب بچوں کے دل کے امراض، بالخصوص پیڈیاٹرک ہارٹ ردم ڈس آرڈرز (Pediatric Heart Rhythm Disorders) کے علاج کے لیے خصوصی وارڈ اور جدید سہولیات فراہم کر دی گئی ہیں۔

طبی ماہرین کے مطابق، یہ علاج اب ای پی اسٹڈی (EP Study)، پیس میکرز (Pacemakers) اور آئی سی ڈی (ICD) ڈیوائسز کے ذریعے ممکن ہو سکے گا۔ پاکستان میں ہر سال 4 سے 5 ہزار بچے پیدائشی طور پر دل کے ان مسائل کے ساتھ پیدا ہو رہے ہیں۔ ماہرین نے خبردار کیا ہے کہ بچوں میں دل کی تیز یا بے ترتیب دھڑکن فالج یا اچانک موت کا سبب بن سکتی ہے، تاہم بروقت تشخیص اور ان جدید آلات کے استعمال سے قیمتی جانیں بچائی جا سکتی ہیں۔

والدین کو ہدایت کی گئی ہے کہ اگر بچوں میں غیر معمولی تھکاوٹ، سینے میں دھمک یا بے ترتیب دھڑکن کی علامات ظاہر ہوں تو اسے معمولی نہ سمجھیں اور فوری طور پر ماہرِ امراضِ قلب سے رجوع کریں۔ این آئی سی وی ڈی میں اس سہولت کی دستیابی سے غریب اور متوسط طبقے سے تعلق رکھنے والے ہزاروں خاندانوں کو نجی ہسپتالوں کے مہنگے علاج سے نجات مل سکے گی۔