امریکا میں وزن کم کرنیوالی نئی گولی کی منظوری، فوڈ کمپنیوں کے شیئرز گرگئے

امریکا میں وزن کم کرنے والی نئی اور نسبتاً سستی GLP-1 گولی کی منظوری کے بعد فوڈ انڈسٹری میں نمایاں تبدیلیوں کا آغاز ہو گیا ہے۔ ماہرین کے مطابق انجیکشن کے مقابلے میں آسان استعمال اور کم قیمت کے باعث یہ گولیاں تیزی سے مقبول ہو رہی ہیں، جس سے صارفین کی تعداد میں خاطر خواہ اضافہ متوقع ہے۔

برطانوی خبر رساں ادارے کی رپورٹ کے مطابق جنوری سے امریکا میں بھوک کم کرنے والی GLP-1 وزن گھٹانے کی گولیوں کی دستیابی فوڈ انڈسٹری کو اپنی مصنوعات میں بڑے پیمانے پر تبدیلیاں کرنے پر مجبور کر دے گی۔ ماہرین کا کہنا ہے کہ چونکہ گولیاں انجیکشن کے مقابلے میں زیادہ آسان اور سستی ہیں، اس لیے زیادہ افراد ان ادویات کا استعمال اختیار کریں گے۔

امریکا کی فوڈ اینڈ ڈرگ ایڈمنسٹریشن (FDA) کی جانب سے نووو نورڈسک کی ویگووی گولی کی منظوری کے بعد فوڈ کمپنیوں کے شیئرز میں کمی دیکھی گئی ہے۔ اندازوں کے مطابق ایلی للی کی حریف دوا بھی اگلے سال منظوری حاصل کر سکتی ہے۔

تحقیق سے یہ بات سامنے آئی ہے کہ GLP-1 ادویات استعمال کرنے والے افراد نمکین اسنیکس، بیکری اشیا، سافٹ ڈرنکس اور شراب پر کم خرچ کرتے ہیں، جبکہ پروٹین اور فائبر سے بھرپور غذاؤں کی جانب زیادہ رجحان دکھاتے ہیں، جس سے فوڈ انڈسٹری کے رجحانات میں نمایاں تبدیلی متوقع ہے