خیبر میں رواں سال پولیو کا چھٹا کیس رپورٹ

خیبر پختونخوا کے ضلع خیبر کی تحصیل جمرود میں 7 سالہ بچے میں پولیو وائرس کی تصدیق ہوئی ہے۔ نیشنل ایمرجنسی آپریشنز سینٹر (NEOC) کے مطابق متاثرہ بچے کا تعلق یونین کونسل غنڈی ‘اے’ سے ہے۔ اس نئے کیس کے بعد ملک بھر میں رواں سال رپورٹ ہونے والے کل 6 پولیو کیسز میں سے 5 کا تعلق صوبہ خیبر پختونخوا سے ہو گیا ہے، جہاں خاص طور پر جنوبی اضلاع، پشاور اور خیبر کو وائرس کی منتقلی کے حوالے سے انتہائی حساس اور ‘ہائی رسک’ زون قرار دیا گیا ہے۔

تازہ ترین کیس سامنے آنے کے فوری بعد این ای او سی نے ضلع خیبر اور دیگر متاثرہ اضلاع میں پولیو کی بچاؤ مہم کو مزید سخت اور مؤثر بنانے کا فیصلہ کیا ہے۔ حکام کے مطابق ان ہائی رسک علاقوں میں بچوں کو زبانی قطرے (OPV) پلانے کے ساتھ ساتھ انجیکشن (IPV) کے ذریعے بھی ویکسینیشن مہم چلانے کی تیاری کی جا رہی ہے۔ پولیو حکام نے والدین سے پرزور اپیل کی ہے کہ وہ بچوں کو پولیو سے دائم عمر معذوری سے بچانے کے لیے تمام تجویز کردہ خوراکیں لازمی پلوائیں۔