سول اسپتال کراچی میں نیوروسرجری یونٹ قائم، صحت کے شعبے میں جدید سہولیات فراہم

سندھ حکومت صحت کے شعبے میں بہترین خدمات کی فراہمی کے لیے کوشاں ہے۔ اس سلسلے میں سول اسپتال کراچی میں نیوروسرجری یونٹ قائم کر دیا گیا ہے، جبکہ اسپتال میں موجود تاریخی عمارتوں کی بہتری اور اپگریڈیشن پر بھی جلد کام شروع ہوگا۔

سندھ کی وزیرِ صحت ڈاکٹر عذرا فضل پیچو نے بتایا کہ سول اسپتال کا ماسٹر پلان جنوری تک مکمل کر لیا جائے گا۔ انہوں نے مزید کہا کہ این آئی سی وی ڈی میں اسٹروک یونٹ قائم کیا گیا ہے اور حاملہ خواتین میں کارڈک اریسٹ کے حوالے سے فوری اقدامات کیے گئے ہیں۔

صوبے میں دیگر صحت کے اقدامات میں کوئٹہ میں این آئی سی وی ڈی کا قیام، کراچی میں 19 چیسٹ پین یونٹس کی فعالیت، نواب شاہ میں بی آئی یو ٹی کا قیام اور ٹراما سینٹر میں ویسکیولر سرجری کی سہولت شامل ہیں۔

ڈاکٹر عذرا نے بتایا کہ لیاری میڈیکل کالج میں روبوٹک سرجری، کوالٹی کنٹرول وارڈ قائم کیا گیا ہے اور نرسنگ طلبہ کے لیے ایوننگ پروگرام اور ماہانہ وظیفہ بھی متعارف کرایا گیا ہے، جس سے طلبہ کی تعلیم اور تربیت میں بہتری آئے گی۔