ملک بھر میں انسدادِ پولیو کی خصوصی مہم جاری: 2 روز میں 1 کروڑ 64 لاکھ سے زائد بچوں کو قطرے پلا دیے گئے

نیشنل ایمرجنسی آپریشنز سینٹر (ای او سی) کے مطابق ملک کے منتخب اضلاع میں انسدادِ پولیو کی خصوصی مہم کا تیسرا روز جاری ہے۔ 21 ستمبر سے شروع ہونے والی یہ خصوصی پولیو مہم 27 ستمبر تک جاری رہے گی، جس کے تحت ملک بھر کے 3 کروڑ 10 لاکھ بچوں کو پولیو سے بچاؤ کے القطرے پلانے کا ہدف مقرر کیا گیا ہے۔ نیشنل ای او سی کے مطابق مہم کے ابتدائی دو دنوں کے دوران اب تک مجموعی طور پر تقریباً 1 کروڑ 64 لاکھ بچوں کی کامیابی سے ویکسینیشن مکمل کی جا چکی ہے، جبکہ 2 لاکھ 73 ہزار پولیو ورکرز گھر گھر جا کر بچوں کو اس مہلک بیماری سے محفوظ بنانے میں مصروفِ عمل ہیں۔

صوبائی اعداد و شمار کا تفصیل سے ذکر کرتے ہوئے نیشنل ای او سی نے بتایا کہ پنجاب کے منتخب اضلاع میں تقریباً 46 لاکھ 18 ہزار، سندھ میں 58 لاکھ 78 ہزار، خیبر پختونخوا میں 43 لاکھ 22 ہزار، اور بلوچستان میں 12 لاکھ 50 ہزار سے زائد بچوں کو قطرے پلائے جا چکے ہیں۔ علاوہ ازیں، وفاقی دارالحکومت اسلام آباد میں 2 لاکھ 90 ہزار سے زائد اور گلگت بلتستان کے 2 منتخب اضلاع میں تقریباً 83 ہزار بچوں کی ویکسینیشن مکمل ہو چکی ہے۔ نیشنل ای او سی نے والدین پر زور دیا ہے کہ پولیو ایک ناقابلِ علاج مرض ہے لیکن بروقت ویکسینیشن کے ذریعے اس سے مکمل بچاؤ ممکن ہے، لہٰذا پانچ سال تک کے ہر بچے کو پولیو سے بچاؤ کے قطرے لازمی پلوائیں اور گھروں پر آنے والے پولیو ورکرز سے تعاون کریں۔ کسی بھی رہنمائی یا ٹیم سے رابطے کے لیے ہیلپ لائن 1166 یا واٹس ایپ نمبر 03467776546 پر رابطہ کیا جا سکتا ہے۔