قومی پولیو مہم جاری، ابتدائی تین روز میں 3 کروڑ 78 لاکھ سے زائد بچوں کی ویکسینیشن مکمل

نیشنل ایمرجنسی آپریشن سینٹر (نیشنل ای او سی) کے مطابق سال 2025 کی آخری اور پانچویں قومی پولیو مہم چوتھے روز بھی کامیابی سے جاری ہے۔ ابتدائی تین روز کے دوران ملک بھر میں 3 کروڑ 78 لاکھ سے زائد بچوں کو پولیو سے بچاؤ کے قطرے پلائے جا چکے ہیں۔

نیشنل ای او سی کے اعداد و شمار کے مطابق پنجاب میں 2 کروڑ 8 لاکھ، سندھ میں 74 لاکھ 18 ہزار، خیبر پختونخوا میں 61 لاکھ 5 ہزار سے زائد اور بلوچستان میں 21 لاکھ 27 ہزار سے زائد بچوں کو پولیو سے بچاؤ کے قطرے پلائے گئے ہیں۔

اسی طرح اسلام آباد میں 4 لاکھ 17 ہزار سے زائد، گلگت بلتستان میں 2 لاکھ 56 ہزار سے زائد جبکہ آزاد جموں و کشمیر میں 6 لاکھ 89 ہزار سے زائد بچوں کی پولیو ویکسینیشن مکمل کی جا چکی ہے۔

نیشنل ای او سی کے مطابق قومی انسدادِ پولیو مہم ملک بھر میں 15 سے 21 دسمبر تک جاری رہے گی، جس کے دوران 4 لاکھ سے زائد پولیو ورکرز گھر گھر جا کر بچوں کو پولیو کے قطرے پلا رہے ہیں۔

نیشنل ای او سی نے والدین سے اپیل کی ہے کہ پولیو ٹیموں کو خوش آمدید کہیں اور اپنے 5 سال سے کم عمر بچوں کو پولیو سے بچاؤ کے قطرے لازمی پلوائیں۔ اعلامیے میں کہا گیا ہے کہ پولیو ایک لاعلاج مرض ہے جو بچوں کو زندگی بھر کی معذوری کا شکار بنا سکتا ہے، جبکہ والدین اور کمیونٹی کی بھرپور شراکت کے بغیر قومی پولیو مہم کی کامیابی ممکن نہیں۔

نیشنل ای او سی کے مطابق یہ پولیو مہم پاکستان اور افغانستان میں بیک وقت منعقد کی جا رہی ہے، تاکہ خطے سے پولیو کے مکمل خاتمے کے ہدف کو حاصل کیا جا سکے۔