انسدادِ پولیو مہم کا پانچواں روز: نیشنل ای او سی کے مطابق اب تک 2 کروڑ 65 لاکھ سے زائد بچوں کی ویکسینیشن مکمل

نیشنل ایمرجنسی آپریشنز سینٹر (نیشنل ای او سی) کے مطابق ملک کے منتخب اضلاع میں انسدادِ پولیو کی خصوصی مہم پانچویں روز بھی بھرپور انداز میں جاری ہے۔ مہم کے پہلے چار روز کے دوران ملک بھر میں 2 کروڑ 65 لاکھ سے زائد بچوں کو پولیو سے بچاؤ کے قطرے پلا دیے گئے ہیں۔ یاد رہے کہ یہ خصوصی مہم 21 سے 27 ستمبر تک جاری ہے، جس کے دوران مجموعی طور پر 3 کروڑ 10 لاکھ بچوں کو پولیو سے محفوظ بنانے کا ہدف مقرر کیا گیا ہے۔

اس قومی فریضے کو نبھانے کے لیے ملک بھر میں 2 لاکھ 73 ہزار سے زائد پولیو ورکرز گھر گھر جا کر بچوں کو ویکسین پلانے میں مصروف ہیں۔ صوبائی اعداد و شمار کے مطابق اب تک پنجاب کے منتخب اضلاع میں تقریباً 75 لاکھ 11 ہزار، سندھ کے 30 اضلاع میں لگ بھگ 94 لاکھ 10 ہزار، اور خیبر پختونخوا کے 37 اضلاع میں 69 لاکھ 20 ہزار سے زائد بچوں کی ویکسینیشن مکمل کی جا چکی ہے۔ اسی طرح بلوچستان کے 32 اضلاع میں 20 لاکھ 93 ہزار، اسلام آباد میں 4 لاکھ 41 ہزار، جبکہ گلگت بلتستان کے 2 منتخب اضلاع میں تقریباً 1 لاکھ 40 ہزار بچوں کو پولیو کے قطرے پلائے جا چکے ہیں۔

نیشنل ای او سی نے اس عزم کا اعادہ کیا ہے کہ پولیو ایک لاعلاج مرض ہے لیکن بروقت ویکسین کے ذریعے اس سے مکمل بچاؤ ممکن ہے۔ والدین سے اپیل کی گئی ہے کہ وہ پولیو ورکرز کے ساتھ تعاون کریں اور پانچ سال تک کے ہر بچے کو پولیو کے قطرے لازمی پلوائیں۔ کسی بھی شکایات یا معلومات کے لیے شہری ہیلپ لائن نمبر 1166 پر کال یا واٹس ایپ نمبر 03467776546 پر رابطہ کر سکتے ہیں۔