قومی انسدادِ پولیو مہم جاری، پہلے روز ایک کروڑ 33 لاکھ سے زائد بچوں کی ویکسینیشن مکمل

ملک بھر میں پولیو کے مکمل خاتمے کے لیے مربوط اور مسلسل اقدامات جاری ہیں۔ نیشنل ایمرجنسی آپریشن سینٹر (نیشنل ای او سی) کے مطابق قومی انسدادِ پولیو مہم دوسرے روز بھی بھرپور انداز میں جاری ہے، جبکہ مہم کے پہلے روز ایک کروڑ 33 لاکھ سے زائد بچوں کو پولیو سے بچاؤ کے قطرے پلائے جا چکے ہیں۔

نیشنل ای او سی کے مطابق صوبہ پنجاب میں 72 لاکھ 30 ہزار بچوں کو پولیو کے قطرے پلائے گئے، جبکہ سندھ میں 26 لاکھ 1 ہزار بچوں کی ویکسینیشن مکمل کی گئی۔ خیبر پختونخوا میں 23 لاکھ 4 ہزار سے زائد بچوں کو پولیو سے بچاؤ کے قطرے پلائے گئے۔

اعداد و شمار کے مطابق بلوچستان میں 7 لاکھ 6 ہزار سے زائد، وفاقی دارالحکومت اسلام آباد میں 1 لاکھ 46 ہزار سے زائد، گلگت بلتستان میں 89 ہزار سے زائد اور آزاد جموں و کشمیر میں 2 لاکھ 42 ہزار سے زائد بچوں کو پولیو سے بچاؤ کے قطرے پلائے گئے۔

نیشنل ای او سی نے واضح کیا کہ پولیو ایک لاعلاج مرض ہے جو بچوں کو زندگی بھر کے لیے معذوری کا شکار بنا دیتا ہے، تاہم بروقت ویکسینیشن کے ذریعے اس مرض سے مکمل تحفظ ممکن ہے۔

ترجمان نیشنل ای او سی نے والدین سے اپیل کی کہ وہ پولیو ٹیموں کو خوش آمدید کہیں اور اپنے پانچ سال سے کم عمر بچوں کو پولیو کے قطرے لازمی پلوائیں۔ ان کا کہنا تھا کہ والدین اور کمیونٹی کی بھرپور شراکت کے بغیر قومی پولیو مہم کی کامیابی ممکن نہیں۔

نیشنل ای او سی کے مطابق پاکستان اور افغانستان میں پولیو مہم بیک وقت جاری ہے تاکہ خطے سے پولیو کے خاتمے کو یقینی بنایا جا سکے۔