صوابی کے گاؤں گندف میں پراسرار بیماری، ایک ہفتے میں 4 بچے جاں بحق

خیبرپختونخوا کے ضلع صوابی کے علاقے گندف گاؤں میں پراسرار بیماری کے باعث ایک ہفتے کے دوران چار بچے جاں بحق ہو گئے ہیں۔

جاں بحق ہونے والے بچوں کی عمریں تین ماہ سے پانچ سال کے درمیان بتائی جا رہی ہیں۔ انتقال کرنے والوں میں محمد اویس، ابورد، عمر خان اور ابو ہریرہ شامل ہیں۔

علاقہ مکینوں کے مطابق بچوں کی اموات خسرے کی وبا کے باعث ہوئیں، جس کے بعد علاقے میں شدید خوف و ہراس پھیل گیا ہے۔

دوسری جانب ڈسٹرکٹ ہیلتھ آفیسر (ڈی ایچ او) عبدالطیف کا کہنا ہے کہ واقعے کا نوٹس لیتے ہوئے محکمہ صحت کی ٹیمیں متاثرہ علاقے میں روانہ کر دی گئی ہیں تاکہ صورتحال کا جائزہ لیا جا سکے اور مزید اموات کو روکا جا سکے۔

محکمہ صحت کے مطابق متاثرہ بچوں کے نمونے حاصل کیے جا رہے ہیں جبکہ علاقے میں حفاظتی اقدامات اور ویکسینیشن پر بھی غور کیا جا رہا ہے۔