صحت کارڈ کا بجٹ 51 ارب روپے، 3 سال میں 25 لاکھ افراد مستفید ہوئے: مزمل اسلم

مشیر خزانہ مزمل اسلم اور وزیر صحت خلیق الرحمان نے ایک مشترکہ پریس کانفرنس سے خطاب کرتے ہوئے کہا ہے کہ صحت ہر شہری کا بنیادی حق ہے اور حکومت اس کی فراہمی کے لیے تمام تر وسائل بروئے کار لا رہی ہے۔

مشیر خزانہ مزمل اسلم نے بتایا کہ رواں سال صحت کارڈ کا بجٹ 51 ارب روپے رکھا گیا ہے، جبکہ گزشتہ تین سالوں میں 25 لاکھ سے زائد افراد صحت کارڈ سے مستفید ہو چکے ہیں اور اس مد میں 100 ارب روپے سے زائد رقم خرچ کی گئی ہے۔ انہوں نے بتایا کہ حکومت کی جانب سے گردے اور جگر کے مہنگے ٹرانسپلانٹ بھی مفت کیے جا رہے ہیں۔ ملک میں ایچ آئی وی (HIV) کے پھیلتے کیسز پر تشویش کا اظہار کرتے ہوئے انہوں نے بتایا کہ پنجاب میں 60 ہزار 739، سندھ میں 31 ہزار سے زائد، خیبرپختونخوا میں 10 ہزار 655 اور اسلام آباد میں 5 ہزار سے زائد ایچ آئی وی کیسز رپورٹ ہوئے ہیں۔ بانی پی ٹی آئی کی صحت کے حوالے سے بات کرتے ہوئے انہوں نے کہا کہ وہ مکمل فٹ ہیں اور انہوں نے کبھی بیرون ملک منتقل ہونے کا مطالبہ نہیں کیا۔

وزیر صحت خلیق الرحمان نے میڈیا کو بتایا کہ 2013ء سے محکمہ صحت میں بڑی اصلاحات لائی گئی ہیں، جس کی بدولت 2015ء میں 36.2 فیصد پر موجود ‘یونیورسل ہیلتھ انڈیکس’ 2024ء میں بڑھ کر 53.5 فیصد ہو گیا ہے۔ انہوں نے مزید کہا کہ رواں سال صحت کے بجٹ میں 22 فیصد کا خاطر خواہ اضافہ کیا گیا ہے اور ادویات کی خریداریاں شفاف طریقے سے مکمل ہو چکی ہیں۔ اس وقت 72 اسپتالوں کو آؤٹ سورس کرنے اور مریضوں کے تمام تر ریکارڈ کو ڈیجیٹلائز کرنے پر کام تیزی سے جاری ہے۔