اسلام آباد میں بنیادی مرکز صحت میں ٹیلی میڈیسن سینٹر کا افتتاح

اسلام آباد: وفاقی وزیر صحت مصطفٰی کمال نے اسلام آباد میں ٹیلی میڈیسن سینٹر کا افتتاح کر دیا۔

افتتاحی تقریب سے خطاب کرتے ہوئے انہوں نے کہا کہ صحت کے شعبے میں ٹیلی میڈیسن ایک انقلاب کی حیثیت رکھتی ہے اور جدید ٹیکنالوجی نے دور دراز علاقوں میں علاج معالجہ آسان بنا دیا ہے۔

وزیر صحت کے مطابق ٹیلی میڈیسن سینٹرز میں مریضوں اور ڈاکٹرز کی باقاعدہ مانیٹرنگ کی جائے گی تاکہ علاج کے معیار کو بہتر بنایا جا سکے۔ انہوں نے کہا کہ حکومت ٹیلی میڈیسن کے ذریعے غریب طبقے کے لیے علاج کو آسان اور قابل رسائی بنانا چاہتی ہے۔انہوں نے مزید کہا کہ بنیادی مراکز صحت کو مضبوط بنانے سے بڑے اسپتالوں پر بوجھ کم ہو گا اور نظام صحت میں جامع اصلاحات لائی جا رہی ہیں۔مصطفٰی کمال کا کہنا تھا کہ تیزی سے بڑھتی ہوئی آبادی کے باعث وسائل پر شدید دباؤ ہے۔ انہوں نے کہا کہ پاکستان میں ہر سال تقریباً نیوزی لینڈ کی آبادی کے برابر اضافہ ہو رہا ہے، جس سے صحت کے نظام پر اضافی بوجھ پڑتا ہے۔انہوں نے اس بات پر بھی زور دیا کہ ہیلتھ کیئر کے بہتر انتظام کے لیے بچوں کی پیدائش میں مناسب وقفہ ضروری ہے، جبکہ موجودہ نظام لوگوں کو بیمار ہونے سے بچانے میں مکمل طور پر کامیاب نہیں ہو سکا۔