ایم ڈی کیٹ کے امتحانات کے حوالے سے اہم فیصلہ کیا: وفاقی وزیرِ صحت کا اعلان

اسلام آباد: وفاقی وزیرِ صحت مصطفیٰ کمال نے پارلیمنٹ ہاؤس میں میڈیا سے گفتگو کرتے ہوئے میڈیکل کالجز میں داخلے کی نئی پالیسی کا اعلان کر دیا ہے۔ انہوں نے بتایا کہ پاکستان میڈیکل اینڈ ڈینٹل کونسل (PMDC) نے فیصلہ کیا ہے کہ آئندہ سال سے ایم ڈی کیٹ کا امتحان ایف ایس سی (FSc) کے نتائج کے صرف 6 روز بعد شروع کر دیا جائے گا۔

مصطفیٰ کمال نے اس فیصلے کی وجوہات بتاتے ہوئے کہا کہ پہلے ایف ایس سی اور ایم ڈی کیٹ کے درمیان 4 سے 6 ماہ کا طویل وقفہ ہوتا تھا، جس کا فائدہ اٹھا کر ‘اکیڈمی مافیا’ طلبہ اور والدین سے لاکھوں روپے بٹورتا تھا۔ انہوں نے واضح کیا کہ امیر والدین کے بچے تو مہنگی فیسیں دے کر تیاری کر لیتے تھے، لیکن متوسط اور غریب گھرانوں کے بچے اس دوڑ میں پیچھے رہ جاتے تھے۔

وفاقی وزیر نے مزید کہا کہ اس فیصلے سے طلبہ کو کروڑوں روپے کی بچت ہوگی اور انہیں ایک ہی نصاب کی دو دو بار تیاری نہیں کرنا پڑے گی۔ یہ نئی پالیسی آنے والے انٹرمیڈیٹ رزلٹ کے ساتھ ہی نافذ العمل ہوگی۔ ادویات کے حوالے سے بات کرتے ہوئے انہوں نے اطمینان دلایا کہ خام مال کا وافر اسٹاک موجود ہے اور نرسنگ کونسل کا معاملہ بھی حل ہو کر کونسل فعال ہو چکی ہے۔