وزیراعلیٰ سندھ کا امراض قلب کے مفت علاج میں رکاوٹ برداشت نہ کرنے کا اعلان

وزیراعلیٰ سندھ مراد علی شاہ نے امراض قلب کے مفت علاج میں کسی بھی رکاوٹ کو برداشت نہ کرنے کا اعلان کیا ہے۔
این آئی سی وی ڈی کی 84 ویں گورننگ باڈی کے اجلاس کی صدارت کرتے ہوئے انہوں نے ہسپتال کے آپریشنل امور کے لیے 15.5 ارب روپے گرانٹ اِن ایڈ کی منظوری دی۔ وزیراعلیٰ نے ہدایت کی کہ چیف آپریٹنگ افسر اور چیف فنانشل افسر کی تقرری فوری طور پر اوپن مارکیٹ اور مسابقتی عمل کے تحت کی جائے تاکہ ادارہ بلا رکاوٹ عوامی خدمت فراہم کر سکے۔

وزیراعلیٰ سندھ نے بریفنگ میں بتایا کہ این آئی سی وی ڈی نے 200 سے زائد ٹی اے وی آئی پروسیجرز مفت کیے ہیں، جبکہ نجی ہسپتالوں میں ان پروسیجرز کی لاگت تقریباً 40 لاکھ روپے ہوتی ہے۔ این آئی سی وی ڈی کراچی دنیا کا سب سے بڑا پرائمری اینجیو پلاسٹیز سینٹر ہے اور 2024 میں 9925 پرائمری اینجیو پلاسٹیز انجام دی گئیں۔

وزیراعلیٰ سندھ نے لانڈھی میں 1200 بستروں پر مشتمل ذوالفقار علی بھٹو انسٹیٹیوٹ آف کارڈیو ویسکولر ڈیزیزز کا جائزہ بھی لیا، جو دنیا کا سب سے بڑا دل کا ہسپتال ہوگا۔ انہوں نے قومی ادارہ امراض قلب اور قومی ادارہ برائے امراض اطفال کے انضمام کے پلان کی بھی ہدایت دی اور پی ایم جی کی تقرری کو حتمی شکل دینے کی ہدایت دی۔