منکی پاکس کے ٹیسٹ اور بہتر علاج معالجے کیلئے متفرق درخواست دائر

لاہور ہائیکورٹ میں منکی پاکس (Mpox) وائرس کے بڑھتے ہوئے کیسز، ٹیسٹنگ کی سہولیات کی کمی اور بہتر علاج معالجے کے حوالے سے ایک متفرق درخواست دائر کر دی گئی ہے۔ یہ درخواست جوڈیشل ایکٹوازم پینل کی جانب سے معروف قانون دان محمد اظہر صدیق ایڈووکیٹ نے دائر کی۔درخواست گزار نے مؤقف اختیار کیا ہے کہ ملک میں منکی پاکس کے کیسز میں مسلسل اضافہ ہو رہا ہے، لیکن محکمہ صحت اس خطرناک وائرس کو کنٹرول کرنے کے لیے ضروری اقدامات کرنے میں مکمل طور پر ناکام نظر آتا ہے۔ درخواست میں درج ذیل اعتراضات اٹھائے گئے ہیں:

آگاہی کی کمی: محکمہ صحت نے عوام کو اس وائرس سے بچاؤ اور احتیاطی تدابیر سے آگاہ کرنے کے لیے کوئی مؤثر مہم نہیں چلائی۔

ٹیسٹنگ لیبارٹریز کا فقدان: وائرس کی تشخیص کے لیے لیبارٹریز اور ٹیسٹنگ کی سہولیات کے بارے میں پبلک آگاہی نہ ہونے کے برابر ہے۔

ڈیٹا کی عدم دستیابی: محکمہ صحت منکی پاکس کے حوالے سے درست اور مکمل ڈیٹا جاری کرنے میں بھی ناکام رہا ہے۔درخواست میں عدالتِ عالیہ سے استدعا کی گئی ہے کہ وہ وفاقی اور صوبائی محکمہ صحت کو منکی پاکس کے پھیلاؤ کو روکنے کے لیے فوری اور ہنگامی اقدامات کرنے کا حکم دے۔ اس کے علاوہ، عوامی سطح پر آگاہی مہم شروع کرنے اور مفت لیب ٹیسٹ کی سہولیات فراہم کرنے کے لیے بھی احکامات جاری کیے جائیں تاکہ قیمتی جانوں کو بچایا جا سکے۔