2025 کی آخری قومی پولیو مہم جاری، 4 کروڑ سے زائد بچوں کو ویکسین پلائی گئی

سال 2025 کی آخری قومی پولیو مہم چھٹے روز بھی بھرپور انداز میں جاری ہے، جس کا انتظام نیشنل ایمرجنسی آپریشن سنٹر (ای او سی) کر رہا ہے۔ مہم کے پہلے پانچ دنوں میں ملک بھر میں 4 کروڑ 38 لاکھ سے زائد بچوں کو پولیو کے قطرے پلائے جا چکے ہیں۔

صوبائی سطح پر صورتحال کچھ یوں ہے: پنجاب میں تقریباً 2 کروڑ 27 لاکھ، سندھ میں 1 کروڑ 2 لاکھ سے زائد، خیبر پختونخوا میں تقریباً 69 لاکھ 31 ہزار، بلوچستان میں تقریباً 25 لاکھ 26 ہزار، اسلام آباد میں 4 لاکھ 50 ہزار سے زائد، گلگت بلتستان میں 2 لاکھ 74 ہزار سے زائد اور آزاد جموں و کشمیر میں 7 لاکھ 14 ہزار سے زائد بچوں کو پولیو کے قطرے پلائے جا چکے ہیں۔

قومی انسدادِ پولیو مہم 15 سے 21 دسمبر تک ملک بھر میں جاری رہے گی اور پاکستان میں یہ مہم افغانستان کے ساتھ بیک وقت منعقد کی جا رہی ہے۔ 4 لاکھ سے زائد پولیو ورکرز گھر گھر جا کر بچوں کو قطرے پلانے کے عمل کو یقینی بنا رہے ہیں۔

نیشنل ای او سی کا کہنا ہے کہ اس مہم کا مقصد بچوں کو پولیو سے بچانا اور ملک کو پولیو سے مکمل پاک کرنا ہے، جس کے لیے تمام متعلقہ ادارے اور اسٹیک ہولڈرز تعاون کر رہے ہیں۔