مردانہ صحت: پروسٹیٹ اور ٹیسٹیکیولر کینسر کی بڑھتی ہوئی شرح اور بروقت تشخیص کی اہمیت

موجودہ دور میں مردانہ امراض میں ٹیسٹیکیولر اور پروسٹیٹ کینسر کے کیسز بڑھ رہے ہیں، تاہم کچھ وجوہات کی بنا پر اس موضوع پر زیادہ بات نہیں کی جاتی۔

اعداد و شمار کے مطابق دل کی بیماری ہر سال مردوں کی 30 فیصد اموات کی وجہ بنتی ہے، ایک کروڑ سے زائد مرد ذیابیطس میں مبتلا ہیں جبکہ تقریباً 72 فیصد مرد ذہنی دباؤ یا تھکاوٹ محسوس کرتے ہیں۔

ماہرین کا کہنا ہے کہ پاکستان میں اکثر مرد اپنی خاندانی ضروریات پوری کرنے کے لیے سخت محنت کرتے ہیں اور اس دوران اپنی صحت نظر انداز کر دیتے ہیں۔

ٹیسٹیکیولر اور پروسٹیٹ کینسر کے کیسز میں اضافہ دیکھنے میں آیا ہے، لیکن صرف 20 فیصد مرد باقاعدہ اسکریننگ کراتے ہیں۔ پروسٹیٹ کینسر کی ابتدائی مراحل میں اکثر علامات ظاہر نہیں ہوتیں، تاہم بروقت تشخیص اور علاج سے یہ بیماری مکمل طور پر قابو میں لائی جا سکتی ہے۔

پروسٹیٹ کینسر کی علامات میں پیشاب میں دشواری، رات کو بار بار پیشاب آنا، پیشاب یا منی میں خون، اور کمر یا کولہوں میں درد شامل ہیں۔ علاج کے اختیارات میں سرجری (روبوٹک سمیت)، تابکاری (ریڈیشن)، ہارمون تھراپی اور کیموتھراپی شامل ہیں۔

علاوہ ازیں، اے آر وائی کیو ٹی کے پروگرام میں ہربلسٹ غالب آغا نے پروسٹیٹ کینسر کے لیے ایک آسان نسخہ تجویز کیا، جس میں صرف ایک درمیانے سائز کا انار اور پانی استعمال ہوتا ہے۔ انار کو پانی میں ابال کر رس نکال کر روزانہ استعمال کرنے سے بیماری کے خطرات کم ہو سکتے ہیں۔

رپورٹس کے مطابق پاکستان میں پروسٹیٹ کینسر بریسٹ کینسر کے بعد 13 ویں نمبر پر ہے جبکہ دنیا کے بیشتر ممالک میں یہ دوسرا سب سے عام مردانہ کینسر ہے۔ 50 سال سے زائد عمر، خاندانی تاریخ اور موٹاپا پروسٹیٹ کینسر کے خطرے کو بڑھاتے ہیں، اس لیے باقاعدہ اسکریننگ (پی ایس اے ٹیسٹ) اور ڈاکٹر سے معائنہ ضروری ہے۔

یاد رہے کہ مردوں کی صحت کا عالمی دن، “انٹرنیشنل مینز ڈے”، ہر سال 19 نومبر کو منایا جاتا ہے، جس کا مقصد مردوں اور لڑکوں کی جسمانی و ذہنی صحت، صنفی تعلقات اور معاشرتی خدمات کے بارے میں شعور اجاگر کرنا ہے۔