آرتھرائٹس میں مبتلا ہزاروں افراد کس خطرناک بیماری کا شکار ہو سکتے ہیں؟

ایک نئی طبی تحقیق میں انکشاف ہوا ہے کہ جوڑوں کے شدید درد (رمیٹیوڈ آرتھرائٹس) میں مبتلا ہزاروں مریض پھیپھڑوں کی ایک خطرناک بیماری کا شکار ہو سکتے ہیں، جس کی بروقت تشخیص نہ ہونے کی صورت میں سنگین پیچیدگیاں پیدا ہو سکتی ہیں۔ طبی جریدے ‘دی لانسیٹ ریسپائریٹری میڈیسن’ میں شائع ہونے والی اس رپورٹ کے مطابق، رمیٹیوڈ آرتھرائٹس محض جوڑوں تک محدود نہیں رہتی بلکہ یہ آٹو امیون بیماری پھیپھڑوں کو بھی متاثر کر سکتی ہے۔ تحقیق کے مرکزی مصنف ڈاکٹر جوشوا سولومن کا کہنا ہے کہ ہر 6 میں سے ایک مریض میں پھیپھڑوں کی خرابی پیدا ہو سکتی ہے، جبکہ ہر 10 میں سے ایک مریض ‘آر اے-آئی ایل ڈی’ (انٹرسٹیشل لنگ ڈیزیز) کا شکار ہو جاتا ہے، جس سے پھیپھڑوں میں سوزش اور داغ پڑنے لگتے ہیں اور سانس لینے میں شدید دشواری ہوتی ہے۔ ماہرین کے مطابق، اگر اس بیماری کی بروقت تشخیص کر لی جائے تو مخصوص ادویات کے ذریعے سوزش کو کم اور پھیپھڑوں میں داغ بننے کے عمل کو سست کر کے اس کا مؤثر علاج ممکن ہے۔