کراچی میں گردوں کے امراض کی یونین کونسل سطح پر سکریننگ کا فیصلہ

میئر کراچی بیرسٹر مرتضیٰ وہاب کی ہدایت پر بلدیہ عظمیٰ کراچی (KMC) نے شہر بھر میں گردوں کے امراض کی مفت سکریننگ اور آگاہی مہم شروع کرنے کا فیصلہ کیا ہے۔ یہ پروگرام کراچی انسٹیٹیوٹ آف کڈنی ڈیزیزز (KIKD) کے زیر اہتمام یونین کونسل (UC) کی سطح پر چیئرمینز کے تعاون سے چلایا جائے گا۔

میئر کراچی نے اس اقدام پر روشنی ڈالتے ہوئے بتایا کہ اس مہم کا بنیادی مقصد شہریوں میں گردوں کی بیماریوں کی بروقت تشخیص، متاثرہ مریضوں کے اصل اعداد و شمار کا تعین اور انہیں بروقت طبی امداد فراہم کرنا ہے۔ تمام یوسیز میں کیمپس لگا کر شہریوں کی ابتدائی طبی جانچ کی جائے گی۔ سکریننگ کے دوران نشاندہی ہونے والے مریضوں کو کے آئی کے ڈی اور بلدیاتی ہسپتالوں میں مکمل معائنے اور مفت علاج کے لیے ریفر کیا جائے گا شہریوں کو گردوں کے امراض سے بچاؤ اور احتیاطی تدابیر سے متعلق بیدار کرنے کے لیے خصوصی مہم چلائی جائے گی۔

مرتضیٰ وہاب نے مزید کہا کہ کراچی انسٹیٹیوٹ آف کڈنی ڈیزیزز میں نہ صرف کراچی بلکہ پورے ملک سے آئے ہوئے مریضوں کا علاج کیا جا رہا ہے اور کے ایم سی اپنے ہسپتالوں کو جدید و مؤثر بنانے کے لیے عملی اقدامات جاری رکھے گی۔