وزیراعلیٰ مریم نواز کا مہلک بیماریوں سے بچاؤ کیلئے صوبہ گیر عوامی مہم چلانے کا فیصلہ

وزیراعلیٰ پنجاب مریم نواز شریف نے صوبے میں مہلک اور وبائی امراض کے بڑھتے ہوئے خطرات کے پیشِ نظر ایک جامع عوامی آگاہی مہم شروع کرنے کا فیصلہ کیا ہے۔ اس مہم کی خاص بات یہ ہے کہ وزیراعلیٰ مریم نواز خود اس مہم کی قیادت کریں گی، جس کا مقصد شہریوں کو خطرناک بیماریوں سے بچاؤ، ان کی ابتدائی علامات اور بروقت علاج کے بارے میں شعور فراہم کرنا ہے۔

خصوصی اجلاس کے دوران وزیراعلیٰ نے ‘چیف منسٹر پنجاب ڈیزیز پریوینشن پروگرام’ (Chief Minister Punjab Disease Prevention Program) کی اصولی منظوری دے دی ہے۔ اس پروگرام کے تحت خاص طور پر ذیابیطس، ٹی بی، ایڈز اور ہیپاٹائٹس جیسی بیماریوں کے سدِباب پر توجہ دی جائے گی۔ مریم نواز کا کہنا تھا کہ صرف علاج فراہم کرنا کافی نہیں، بلکہ مریضوں کو زندگی کی امید دلانا اور احتیاطی تدابیر سے آگاہ کرنا بھی حکومت کی اولین ترجیح ہے۔