کراچی: میک اے وش پاکستان نے خون کے موروثی مرض میں مبتلا بچی کی دیرینہ خواہش پوری کر دی

میک اے وش پاکستان اور مزارات کی کمیٹی نے خون کے موروثی مرض میں مبتلا 15 سالہ بچی کی دیرینہ خواہش پوری کر دی۔ بچی نے قائداعظم محمد علی جناح کے یومِ پیدائش کے موقع پر مزارِ قائد پر پھولوں کی چادر چڑھانے اور حاضری دینے کی خواہش ظاہر کی تھی، جسے پورا کر دیا گیا۔

اس موقع پر بچی اور اس کے اہلِ خانہ نے خوشی اور مسرت کا اظہار کیا اور میک اے وش پاکستان کا شکریہ ادا کیا۔ میک اے وش پاکستان کے بانی چیئرمین، فاؤنڈیشن کے عہدیداران اور رضاکار بھی موجود تھے۔

میک اے وش پاکستان موروثی اور جان لیوا امراض میں مبتلا بچوں کی خواہشات پوری کرنے کا ادارہ ہے، جو اب تک 20 ہزار سے زائد بچوں کی خواہشات مکمل کر چکا ہے۔