کسٹمز کی بڑی کارروائی ، ایک کروڑ 34 لاکھ روپے مالیت کی اسمگل شدہ چاندی ضبط

کلیکٹریٹ آف کسٹمز ملتان نے اسمگلنگ کی بڑی کوشش ناکام بناتے ہوئے ایک کروڑ چونتیس لاکھ روپے مالیت کی تیس کلو چاندی ضبط کرلی۔
ایف بی آر کے مطابق کارروائی ڈیرہ غازی خان کے قبائلی علاقے بواتہ کے قریب کی گئی، جہاں کسٹمز حکام نے ایک مسافر بس کی تلاشی کے دوران اسمگل شدہ چاندی برآمد کی۔ترجمان ایف بی آر کے مطابق بس کے کسی مسافر نے چاندی کی ملکیت کا دعویٰ نہیں کیا، جس پر مال کو کسٹمز ایکٹ 1969 کے تحت تحویل میں لے لیا گیا۔
ایف بی آر کا کہنا ہے کہ اسمگل شدہ سامان کے ماخذ، روٹ اور ملوث عناصر کی گرفتاری کے لیے تحقیقات جاری ہیں۔
ترجمان نے مزید کہا کہ فیڈرل بورڈ آف ریونیو محصولات کے تحفظ اور تمام داخلی و خارجی راستوں پر کسٹمز قوانین کے سخت نفاذ کے لیے پرعزم ہے