ماہرین نے عمر بڑھانے کا انتہائی آسان ترین نسخہ بتا دیا

امریکی جریدے ’امریکن جرنل آف کلینیکل نیوٹریشن‘ میں شائع ہونے والی ایک جدید تحقیق کے مطابق روزانہ کی خوراک میں معمولی سی کمی انسانی عمر میں اضافے اور بڑھاپے کی بیماریوں سے بچاؤ کا باعث بن سکتی ہے۔ تحقیق کے مطابق اگر کوئی شخص اپنی روزانہ کی کیلوریز میں محض 10 سے 15 فیصد کمی کر دے، تو اس سے نہ صرف وزن کم ہوتا ہے بلکہ دل کی صحت، بلڈ پریشر اور شوگر کنٹرول میں بھی نمایاں بہتری آتی ہے۔

تحقیق کے دوران 143 صحت مند افراد کا دو سال تک مشاہدہ کیا گیا، جنہوں نے اپنی خوراک میں اوسطاً 12 فیصد کمی کی۔ اس کے نتیجے میں شرکاء کا کولیسٹرول گھٹ گیا، انسولین کی حساسیت بہتر ہوئی اور وزن میں تقریباً 10 فیصد کمی ریکارڈ کی گئی۔ ماہرین کا کہنا ہے کہ یہ نتائج اس لیے اہم ہیں کیونکہ یہ ہدف حاصل کرنا نہایت آسان ہے۔ مثال کے طور پر روزانہ 2000 کیلوریز لینے والے شخص کو صرف 200 کیلوریز کم کرنی ہوں گی، جو کہ محض ایک پیکٹ چپس یا ایک ڈونٹ کے برابر ہے۔ ڈاکٹرز کا کہنا ہے کہ خوراک کم کرنے سے جسم توانائی کا مؤثر استعمال کرتا ہے، جس سے کینسر اور پارکنسنز جیسی بیماریوں کا خطرہ کم ہو جاتا ہے۔ تاہم، 65 سال سے زائد عمر کے افراد اور حاملہ خواتین کو اس پر عمل سے قبل ڈاکٹر سے مشورہ کرنے کی ہدایت کی گئی ہے۔