صرف ایک یا دو سگریٹ روزانہ بھی دل کی بیماریوں اور موت کا خطرہ بڑھا دیتے ہیں

ایک نئی طبی تحقیق سے معلوم ہوا ہے کہ روزانہ صرف ایک یا دو سگریٹ پینے کی عادت بھی صحت کے لیے شدید خطرہ پیدا کرتی ہے اور دل کی بیماریوں کے ساتھ کسی بھی وجہ سے موت کے امکانات کو نمایاں حد تک بڑھا دیتی ہے۔

اس سے پہلے بھی تحقیقی رپورٹس میں یہ بات سامنے آئی تھی کہ تمباکو نوشی کرنے والے افراد میں امراض قلب کا خطرہ زیادہ ہوتا ہے، لیکن روزانہ معمولی مقدار میں سگریٹ پینے کے اثرات پر زیادہ کام نہیں ہوا تھا۔

جرنل PLOS Medicine میں شائع تحقیق میں 3 لاکھ سے زائد بالغ افراد پر مبنی 22 طویل المعیاد مطالعات کے ڈیٹا کا تجزیہ کیا گیا۔ ان افراد کی صحت کا اوسطاً 20 سال تک جائزہ لیا گیا، جس دوران ایک لاکھ 25 ہزار سے زائد اموات ہوئیں اور 54 ہزار افراد میں ہارٹ اٹیک، فالج اور ہارٹ فیلیئر کی تشخیص ہوئی۔

تحقیق کے نتائج سے پتہ چلا کہ تمباکو نوشی سے پاک افراد کے مقابلے میں معمولی سگریٹ نوش افراد (روزانہ 2 سے 5 سگریٹ) میں ہارٹ فیلیئر کا خطرہ 50 فیصد اور کسی بھی وجہ سے موت کا خطرہ 60 فیصد تک بڑھ جاتا ہے۔

یہ خطرہ سگریٹ چھوڑنے کے بعد بھی برقرار رہتا ہے، اگرچہ 10 سال کے بعد نمایاں کمی آ جاتی ہے۔ البتہ 30 سال بعد بھی ماضی میں تمباکو نوشی کرنے والوں میں امراض قلب کا خطرہ ہمیشہ رہنے والوں کے مقابلے میں زیادہ رہتا ہے۔

محققین کے مطابق جوانی میں تمباکو نوشی ترک کرنا دل کی بیماریوں سے بچاؤ کا سب سے مؤثر طریقہ ہے۔ انہوں نے مزید کہا کہ عمر کے ساتھ سگریٹس کی مقدار میں بتدریج کمی کرنے سے دل کے امراض کے خطرے میں کوئی خاص فرق نہیں آتا۔

تحقیق کے مطابق، روزانہ ایک یا دو سگریٹ پینے کی عادت بھی دل کی بیماریوں کے خطرے کو نمایاں حد تک بڑھا دیتی ہے، جو ایک حیران کن دریافت ہے۔