لاہور جنرل ہسپتال کی ایمرجنسی سے لاکھوں روپے کی ادویات چوری پکڑی گئی

لاہور: لاہور جنرل ہسپتال کی ایمرجنسی سے 2 لاکھ 60 ہزار روپے مالیت کی سرکاری ادویات اور طبی سامان چوری ہونے کا انکشاف ہوا ہے، جس پر ہسپتال انتظامیہ نے فوری کارروائی کرتے ہوئے ملزم کو پولیس کے حوالے کر دیا۔

ذرائع کے مطابق چوری ہونے والے سامان میں اینٹی بائیوٹکس، معدے کے علاج کے انجکشنز، سرجیکل گلوز، برنولہ، اور سی وی پی (CVP) لائنز سمیت دیگر اہم سرکاری طبی سامان شامل تھا۔ ہسپتال انتظامیہ کی کارروائی کے دوران ملزم مبشر اقبال کے قبضے سے چوری شدہ ادویات اور تمام طبی سامان برآمد کر لیا گیا۔

دورانِ تفتیش گرفتار ملزم مبشر اقبال نے سنسنی خیز انکشاف کرتے ہوئے ادویات چوری کرنے کی تمام تر ذمہ داری ہسپتال کے ڈسپنسر میاں حامد ندیم پر عائد کر دی۔ ملزم کا ادعا تھا کہ ڈسپنسر خود اسے ادویات اٹھانے کے لیے بلایا کرتا تھا، جس کے بعد وہ یہ سامان منتقل کرتا تھا۔

ایم ایس لاہور جنرل ہسپتال ڈاکٹر فرہاد حسین نے واقعے کی تصدیق کرتے ہوئے کہا کہ سرکاری ادویات کی چوری میں ملوث عناصر کے خلاف قانونی کارروائی کی جا رہی ہے اور پولیس میں مقدمہ درج کروایا جا رہا ہے۔ انتظامیہ کا کہنا ہے کہ واقعے کی تمام پہلوؤں سے مکمل شفاف تحقیقات کی جائیں گی تاکہ ہسپتال کے اندر موجود دیگر ممکنہ سہولت کاروں کی نشاندہی ہو سکے۔