خیبرپختونخوا: ہسپتالوں میں ڈاکٹروں کی احتجاجی ہڑتال چھٹے روز بھی جاری

خیبرپختونخوا میں ڈاکٹروں کی احتجاجی ہڑتال شدت اختیار کر گئی ہے۔ جنوبی اضلاع اور مالاکنڈ کے بعد اب پشاور کے بڑے تدریسی ہسپتالوں، بشمول خیبر ٹیچنگ ہسپتال (KTH) اور حیات آباد میڈیکل کمپلیکس (HMC) میں بھی ڈاکٹروں نے ڈیوٹیوں کا بائیکاٹ کر دیا ہے۔ او پی ڈیز کی بندش کے باعث دور دراز سے آئے سینکڑوں مریض خوار ہو گئے ہیں اور آپریشنز منسوخ ہونے سے انسانی جانوں کو خطرات لاحق ہیں۔ اگرچہ ایمرجنسی وارڈز میں ڈاکٹروں کی تعداد دگنی کر دی گئی ہے، تاہم عام مریضوں کے لیے ہسپتالوں کی انتظامیہ سروسز بحال کرنے میں مکمل ناکام نظر آتی ہے۔