لاہور ایئر پورٹ: ایف آئی اے ملازمین کیلئے سکرینگ اور ویکسی نیشن کیمپ کا افتتاح

لاہور: پنجاب کے صوبائی وزیر برائے پرائمری اینڈ سیکنڈری ہیلتھ کیئر و بہبودِ آبادی خواجہ عمران نذیر نے علامہ اقبال انٹرنیشنل ایئرپورٹ پر فیڈرل انویسٹی گیشن ایجنسی (FIA) کے افسران اور ملازمین کی صحت کو یقینی بنانے کے لیے ایک خصوصی اسکریننگ اور ویکسینیشن کیمپ کا باقاعدہ افتتاح کر دیا ہے۔

اس موقع پر ڈائریکٹر ایف آئی اے لاہور زون کیپٹن (ر) محمد علی ضیا، ایس پی اویس شفیق، سی ای او ہیلتھ لاہور اور دیگر اعلیٰ حکام بھی موجود تھے۔ کیمپ کی افادیت کو اجاگر کرنے کے لیے ڈائریکٹر ایف آئی اے نے خود بھی اپنا بلڈ ٹیسٹ کروایا۔ میڈیا سے گفتگو کرتے ہوئے خواجہ عمران نذیر نے کہا کہ “پاکستان کے تمام ادارے ہمارے اپنے ہیں، اور ہماری حکومت پنجاب سمیت ملک کے ہر ادارے کے ملازمین کو بہترین طبی سہولیات فراہم کرنے کے لیے ہمہ وقت تیار ہے۔”

صوبائی وزیر نے ڈائریکٹر ایف آئی اے کے ہمراہ ایئرپورٹ پر قائم فیلڈ ہسپتال کا بھی معائنہ کیا۔ کیپٹن (ر) محمد علی ضیا نے فرنٹ لائن پر کام کرنے والے ملازمین کے لیے ان طبی سہولیات کی فراہمی پر وزیرِ صحت کا شکریہ ادا کیا۔ خواجہ عمران نذیر نے محکمہ صحت کے حکام کو ہدایت کی کہ مستقبل میں بھی ایف آئی اے کے عملے کے لیے اسکریننگ اور ویکسینیشن کے عمل کو تسلسل کے ساتھ جاری رکھا جائے۔