کراچی میں منکی پاکس کا مشتبہ کیس سامنے آگیا

کراچی کے جناح ہسپتال میں منکی پاکس کا ایک مشتبہ کیس رپورٹ ہوا ہے، جس کے بعد 50 سالہ مریض کو مزید طبی امداد اور تشخیص کے لیے سندھ انفیکشیئس ڈیزیزز ہسپتال منتقل کر دیا گیا ہے۔ ہسپتال ذرائع کے مطابق مریض کا تعلق نوابشاہ سے ہے اور اس میں منکی پاکس سے مشابہ علامات پائی گئی ہیں، جبکہ اس کی بیرونِ ملک سفر کی کوئی تاریخ نہیں ہے اور اسے پہلے سے گردوں کا مرض بھی لاحق ہے۔ محکمہ صحت کے مطابق رواں سال سندھ میں اب تک منکی پاکس کے 40 سے زائد کیسز کی تصدیق ہو چکی ہے، اور موجودہ مریض کے حتمی ٹیسٹ کے نتائج کا انتظار کیا جا رہا ہے۔