کراچی کے اسپتالوں میں مسکیولواسکیلیٹل کینسر کے کیسز میں اضافہ

کراچی کے اسپتالوں میں مسکیولواسکیلیٹل ٹیومرز کے کیسز میں اضافہ دیکھا جا رہا ہے، جن میں بچوں اور بالغوں میں مختلف علامات سامنے آتی ہیں۔

جناح اسپتال کے ماہر امراض ہڈی و جوڑ، ڈاکٹر سجاد بگھیو نے ایکسپریس نیوز سے گفتگو میں بتایا کہ یہ ٹیومرز ہڈی، پٹھوں، چربی اور دیگر نرم ٹشوز کے کینسر پر مشتمل ہوتے ہیں، لیکن اکثر لوگ انہیں نظر انداز کر دیتے ہیں۔

بچوں میں علامات

• ہڈیوں کے ٹیومرز زیادہ عام

• اکثر درد ہوتا ہے

• بیرونی سوجن یا نمایاں علامات نہیں ہوتیں

بالغ افراد میں علامات

• گوشت اور پٹھوں کے ٹیومرز زیادہ عام

• ابتدائی طور پر درد نہیں ہوتا

• سوجن ظاہر ہونا شروع ہو جاتی ہے، جس پر توجہ دینا ضروری ہے

خطرے کی علامتیں

• ہاتھ، پیر یا ٹانگ میں مسلسل بڑھتی ہوئی سوجن جو ایک ماہ سے زیادہ برقرار رہے

• ہڈی میں ایسا درد جو رات کے وقت زیادہ ہو یا عام دواؤں سے کم نہ ہو

• معمولی چوٹ سے ہڈی ٹوٹ جائے، جو پہلے سے موجود بیماری یا کینسر کی نشانی ہو سکتی ہے

ڈاکٹر سجاد بگھیو نے کہا کہ بائیوپسی سے پہلے کیس کی مکمل تحقیقات ضروری ہیں، جس میں ایکس رے، ایم آر آئی اور دیگر ٹیسٹ شامل ہیں۔ علاج کے عمل میں پہلے شدید کیسز میں کیمو تھراپی اور ریڈیو تھراپی کی جاتی ہے، اور اس کے بعد سرجری کی جاتی ہے۔

ان کے مطابق، گوشت اور پٹھوں کے ٹیومرز بالغوں میں اکثر بغیر درد کے شروع ہوتے ہیں، اسی لیے بروقت تشخیص بہت اہم ہے، جبکہ بچوں میں ہڈیوں کے ٹیومرز درد کے ساتھ ظاہر ہوتے ہیں۔ ڈاکٹر نے عوام کو ہدایت کی کہ مشتبہ علامات کی صورت میں فوری طور پر ماہر آرتھوپیڈک یا آنکولوجی سرجن سے رجوع کریں اور دیسی علاج پر انحصار نہ کریں۔