کراچی: 8 سال کی بچی ریبیز کا شکار، سال 2026 کا پہلا کیس رپورٹ

کراچی میں ریبیز کا سال 2026 کا پہلا کیس رپورٹ ہو گیا، جہاں آٹھ سالہ بچی پاگل کتے کے کاٹنے کے بعد مہلک مرض میں مبتلا ہو گئی۔

اسپتال حکام کے مطابق متاثرہ بچی کو آوارہ کتے نے کاٹا تھا، تاہم کتے کے کاٹنے کے تقریباً ڈیڑھ ماہ بعد اس میں ریبیز کی علامات ظاہر ہوئیں۔ بچی میں ہائیڈروفوبیا اور ایروفوبیا جیسی واضح علامات پائی گئیں جس کے بعد ریبیز کی تصدیق کر دی گئی۔

حکام کا کہنا ہے کہ متاثرہ بچی کو انڈس اسپتال کراچی منتقل کر دیا گیا ہے جہاں اسے پیلی ایٹو کیئر پر رکھا گیا ہے، جبکہ ریبیز سے بچاؤ کی ویکسین بھی ہسپتال میں لگائی گئی۔

محکمہ صحت کے مطابق صرف رواں ماہ کے دوران کراچی میں کتے کے کاٹنے کے 3 ہزار سے زائد کیسز رپورٹ ہو چکے ہیں، جو ایک تشویشناک صورتحال کی نشاندہی کرتے ہیں۔

ماہرین صحت نے شہریوں کو ہدایت کی ہے کہ کتے کے کاٹنے کی صورت میں زخم کو فوری طور پر اچھی طرح دھویا جائے اور مکمل ویکسینیشن کو ہر صورت یقینی بنایا جائے۔