کراچی: ریبیز کا قہر، 24 گھنٹوں میں 10 سالہ بچی سمیت 2 افراد جاں بحق

شہرِ قائد میں سگ گزیدگی (Rabies) کے باعث اموات کا سلسلہ تھم نہ سکا، گزشتہ 24 گھنٹوں کے دوران مزید دو قیمتی جانیں ضائع ہو گئیں۔ رواں سال کراچی میں ریبیز سے جاں بحق ہونے والوں کی مجموعی تعداد 4 ہو گئی ہے۔

 جناح ہسپتال میں زیرِ علاج 75 سالہ بزرگ دم توڑ گئے۔ انہیں تین ماہ قبل کتے نے پاؤں پر کاٹا تھا، تاہم بروقت موثر علاج نہ ہونے سے وائرس دماغ تک پھیل گیا۔ انڈس ہسپتال میں 10 سالہ بچی انتقال کر گئی۔ بچی کو دو ماہ قبل چہرے پر کتے نے کاٹا تھا۔ چہرے پر زخم ہونے کی وجہ سے وائرس نے تیزی سے اثر دکھایا۔

 کراچی کے پانچ بڑے ہسپتالوں میں اب تک 8 ہزار سے زائد افراد کتے کے کاٹنے کے باعث رپورٹ ہو چکے ہیں۔ ڈاکٹرز کے مطابق کئی سرکاری ہسپتالوں میں زندگی بچانے والی ویکسین دستیاب نہیں ہے، جو اموات کی ایک بڑی وجہ بن رہی ہے۔ طبی ماہرین کا کہنا ہے کہ لوگ کتے کے کاٹنے کو معمولی سمجھتے ہیں یا ٹوٹکوں پر عمل کرتے ہیں۔ ریبیز ایک لاعلاج مرض ہے، اس سے بچاؤ کا واحد حل کتے کے کاٹنے کے فوراً بعد ویکسین لگوانا ہے۔