کراچی: منکی پاکس کا ایک اور کیس رپورٹ، متاثرہ افراد کی تعداد 9 ہوگئی

کراچی میں منکی پاکس وائرس کا ایک اور کیس رپورٹ ہوا ہے، جس کے بعد شہر میں متاثرہ افراد کی مجموعی تعداد 9 تک پہنچ گئی ہے۔ ہسپتال حکام کے مطابق ٹھان کالونی سے تعلق رکھنے والے 38 سالہ شخص میں گزشتہ روز وائرس کی تصدیق ہوئی، جس کے بعد اسے فوری طور پر انفیکشیس ڈیزیز ہسپتال منتقل کر دیا گیا ہے۔ محکمہ صحت کے حکام کا کہنا ہے کہ مریض کی حالت خطرے سے باہر ہے، تاہم وائرس کے پھیلاؤ کو روکنے کے لیے ان تمام افراد کا سراغ لگایا جا رہا ہے جو متاثرہ مریض کے رابطے میں رہے تھے۔ حالیہ کیسز میں اضافے کے پیش نظر شہریوں کو ہدایت کی گئی ہے کہ وہ احتیاطی تدابیر اپنائیں اور علامات ظاہر ہونے کی صورت میں فوری طبی معائنہ کروائیں۔