شہر قائد میں سات روزہ انسداد پولیو مہم کی تاریخ کا اعلان

شہرِ قائد کراچی میں انسدادِ پولیو مہم کا آغاز 6 جولائی سے ہو گیا ہے، جو ایک ہفتے تک جاری رہے گی۔ مہم کی تیاریوں کا جائزہ لینے کے لیے کمشنر کراچی سید حسن نقوی کی زیر صدارت ایک اعلیٰ سطح کا اجلاس منعقد ہوا، جس میں بریفنگ کے دوران بتایا گیا کہ اس مہم کے تحت کراچی بھر میں 25 لاکھ بچوں کو پولیو سے بچاؤ کے قطرے پلانے کا ہدف مقرر کیا گیا ہے۔ مہم کی کامیابی کے لیے مجموعی طور پر 26 ہزار پولیو ورکرز اپنے فرائض انجام دیں گے، جبکہ ان کی سیکیورٹی کو یقینی بنانے کے لیے 7 ہزار سیکیورٹی اہلکار بھی تعینات کیے جائیں گے۔ اس موقع پر کمشنر کراچی سید حسن نقوی نے تمام ڈپٹی کمشنرز کو سخت ہدایت کی کہ وہ قطرے پینے سے رہ جانے والے اور انکار کرنے والے بچوں پر خصوصی توجہ دیں تاکہ سو فیصد اہداف کو حاصل کیا جا سکے۔