جاپان کا پاکستان میں ٹی بی اسکریننگ کے لیے اہم اقدام، 21 ملین ین کی گرانٹ

جاپانی حکومت نے پاکستان میں تپِ دق (ٹی بی) کی اسکریننگ اور بنیادی طبی سہولیات کے لیے ڈوپسی فاؤنڈیشن کو 21 ملین ین (تقریباً 1 لاکھ 42 ہزار 500 امریکی ڈالر) کی گرانٹ فراہم کرنے کا فیصلہ کیا ہے۔ گرانٹ کے معاہدے پر پاکستان میں جاپان کے سفیر اکامٹسو شیوچی اور ڈوپسی فاؤنڈیشن کے نمائندے نے دستخط کیے۔ اس منصوبے کے تحت اسلام آباد، راولپنڈی اور ضلع چکوال میں مصنوعی ذہانت (AI) ٹیکنالوجی، کمپیکٹ ایکسرے اور ڈیجیٹل ریڈیوگرافی سے لیس ایک موبائل ہیلتھ یونٹ تعینات کیا جائے گا جس سے سالانہ 20 ہزار سے زائد افراد مستفید ہوں گے۔ جاپانی سفیر نے کہا کہ بروقت تشخیص زندگیوں کو بچانے کے لیے اہم ہے اور یہ اقدام دونوں ممالک کے درمیان دیرینہ تعلقات کو مزید مضبوط کرے گا۔