پمز میں زیرعلاج 40 سالہ خاتون میں ایم پاکس کی تصدیق ہوگئی

اسلام آباد کے پاکستان انسٹی ٹیوٹ آف میڈیکل سائنسز (پمز) میں زیرِ علاج 40 سالہ خاتون میں ایم پاکس (Mpox) وائرس سے متاثر ہونے کا انکشاف ہوا ہے۔ قومی ادارہ صحت (NIH) نے شکریال سے تعلق رکھنے والی اس خاتون کے ٹیسٹ کی رپورٹ کے بعد وائرس کی موجودگی کی باضابطہ تصدیق کر دی ہے۔ ذرائع کے مطابق متاثرہ خاتون کو چہرے پر جلد کے شدید متاثر ہونے پر گزشتہ ہفتے پمز ہسپتال منتقل کیا گیا تھا۔

فی الوقت مریضہ کو پمز کے خصوصی انفیکشن کنٹرول یونٹ اور آئسولیشن وارڈ میں منتقل کر کے طبی امداد دی جا رہی ہے، جہاں ان کی دیکھ بھال اور علامات پر مسلسل نظر رکھی جا رہی ہے۔ قومی ادارہ صحت اور ہسپتال انتظامیہ نے وائرس کے پھیلاؤ کو روکنے کے لیے خاتون کے خاندانی و تمام قریبی رابطوں (Contacts) کی ٹریسنگ کا عمل بھی شروع کر دیا ہے تاکہ آئندہ خطرات سے نمٹا جا سکے۔