حکیم شہزاد کی رجسٹریشن منسوخی سے متعلق طب کونسل کا فیصلہ معطل

اسلام آباد ہائیکورٹ نے معروف طبیب اور ٹک ٹاکر حکیم شہزاد کی بطور طبیب رجسٹریشن منسوخ کرنے سے متعلق نیشنل کونسل فار طب کا فیصلہ معطل کرتے ہوئے طب کونسل کو نوٹس جاری کر کے جواب طلب کر لیا ہے۔ کیس کی سماعت اسلام آباد ہائیکورٹ کے جج جسٹس محمد آصف نے کی۔ سماعت کے دوران درخواست گزار حکیم شہزاد کی جانب سے نامور وکیل شیر افضل مروت عدالت عالیہ میں پیش ہوئے۔وکیل صفائی شیر افضل مروت نے موقف اختیار کیا کہ طب کونسل نے اپنے ایک یکطرفہ فیصلے میں حکیم شہزاد کا موقف اور دفاع سنے بغیر ہی بطور طبیب ان کی رجسٹریشن منسوخ کرنے کا حکم جاری کیا۔ انہوں نے استدعا کی کہ کونسل کی جانب سے بغیر سماعت کے رجسٹریشن منسوخ کرنے کے اس اقدام کو کالعدم قرار دیا جائے۔ عدالت نے ابتدائی دلائل سننے کے بعد طب کونسل کے فیصلے کو آئندہ سماعت تک معطل کر دیا اور نیشنل کونسل فار طب کو باقاعدہ نوٹس جاری کرتے ہوئے آئندہ سماعت پر جواب داخل کرنے کا حکم دیا، جس کے بعد کیس کی مزید سماعت ملتوی کر دی گئی۔