انسانی اعضا اور پلیسینٹا کی غیر قانونی خرید و فروخت کیس میں چینی باشندوں سمیت ملزمان کی ضمانتیں خارج

ڈسٹرکٹ اینڈ سیشن کورٹ اسلام آباد نے انسانی اعضا کی غیر قانونی خرید و فروخت کے مقدمے میں ملوث ملزمان محمد وقاص، لی گانگکائی، وانگ باؤ اور پینگ فی گو کی ضمانت بعد از گرفتاری کی درخواستیں خارج کرنے کا تفصیلی تحریری حکمنامہ جاری کر دیا ہے۔ ایڈیشنل سیشن جج افضل مجوکہ کی جانب سے جاری کردہ حکمنامے کے مطابق، ایف آئی اے (FIA) نے اسلام آباد میں ایک چھاپے کے دوران بڑی مقدار میں انسانی اعضا اور پلیسینٹا (Placenta) برآمد کیا تھا۔ عدالتی فیصلے میں واضح کیا گیا ہے کہ فرانزک رپورٹ کے مطابق برآمد شدہ پلیسینٹا میں انسانی ڈی این اے (DNA) کی موجودگی ثابت ہوئی ہے، اور چونکہ پلیسینٹا انسانی جسم کا حصہ ہے، اس لیے اس کی غیر قانونی تجارت ایک انتہائی سنگین معاملہ ہے۔ عدالت نے اپنے فیصلے میں مزید تحریر کیا کہ پلیسینٹا عام طور پر بیوٹی کریموں، اینٹی ایجنگ مصنوعات اور پلاسٹک سرجری کے انجیکشنز میں استعمال ہوتا ہے، اور اتنی بڑی مقدار میں اس کی برآمدگی واضح طور پر غیر قانونی سرگرمیوں کی نشاندہی کرتی ہے۔ عدالت نے مقدمے کو بادی النظر میں انتہائی سنگین نوعیت کا قرار دیتے ہوئے ملزمان کی ضمانت کی درخواستوں کو مسترد کر دیا۔