جسم میں آئرن کی کمی کسی دماغی بیماری کے خطرات کا سبب ہو سکتی ہے؟

سویڈن میں ہونے والی ایک نئی اور جامع طبی تحقیق نے انکشاف کیا ہے کہ جسم میں آئرن کی شدید کمی (اینیمیا) اور بڑھاپے میں یادداشت کے چھن جانے کی بیماری ‘ڈیمنشیا’ کے درمیان گہرا تعلق موجود ہے۔ اس تحقیق کے مطابق، خون کی کمی کا شکار افراد میں ڈیمنشیا کا خطرہ دیگر افراد کے مقابلے میں 60 فیصد سے بھی زیادہ دیکھا گیا ہے۔

سائنس دانوں نے 60 سال سے زائد عمر کے ہزاروں افراد کا تقریباً 10 سال تک مشاہدہ کیا، جس کے بعد یہ نتائج سامنے آئے۔ ماہرین کا کہنا ہے کہ اگرچہ یہ تحقیق براہِ راست اینیمیا کو ڈیمنشیا کی وجہ ثابت نہیں کرتی، لیکن یہ ایک ایسا مضبوط اشارہ ہے جسے نظر انداز نہیں کیا جا سکتا۔