انسولین انجیکشن ماضی کا قصہ بننے کے قریب

ٹوکیو: جاپان کی کوماموٹو (Kumamoto) یونیورسٹی کے محققین نے ذیابیطس کے علاج میں ایک ایسی بریک تھرو کامیابی حاصل کی ہے جس کا انتظار گزشتہ 100 برسوں سے کیا جا رہا تھا۔ ماہرین نے ایک ایسی دوا تیار کرنے میں کامیابی حاصل کر لی ہے جو خون میں گلوکوز کی سطح کو کنٹرول کرنے کے لیے روزانہ لگائے جانے والے انسولین انجکشنز کی ضرورت کو ختم کر سکتی ہے۔

انسولین کو گولی کی شکل دینا ہمیشہ سے ایک چیلنج رہا ہے کیونکہ یہ ایک پروٹین ہے جو جگر تک پہنچنے سے پہلے ہی معدے اور آنتوں کے تیزاب میں جذب ہو جاتا ہے۔ تاہم، جاپانی ماہرین نے اس رکاوٹ کو دور کرنے کے لیے ایک خاص ‘سائیکلک پیپٹائڈ’ (Cyclic Peptide) کا استعمال کیا ہے، جو انسولین کو بحفاظت چھوٹی آنت تک پہنچانے اور وہاں سے خون میں شامل کرنے کی صلاحیت رکھتا ہے۔

چوہوں پر کیے گئے تجربات کے دوران محققین نے دو مختلف طریقہ کار اپنائے۔ ایک طریقے میں انسولین کو زنک کے ذریعے مستحکم کر کے پیپٹائڈ کے ساتھ جوڑا گیا، جس کے نتیجے میں نہ صرف بلڈ شوگر لیول معمول پر آ گیا بلکہ صرف ایک خوراک سے مسلسل 3 دن تک انسولین کی سطح کو برقرار رکھنا ممکن ہو گیا۔ ماہرین کا کہنا ہے کہ اس نئی ٹیکنالوجی سے مریضوں کے معیارِ زندگی میں نمایاں بہتری آئے گی اور گردوں کی خرابی، بینائی کے متاثر ہونے اور امراضِ قلب جیسی پیچیدگیوں سے بچاؤ ممکن ہو سکے گا۔ تاہم، عام مارکیٹ میں دستیابی سے قبل انسانوں پر بڑے پیمانے پر کلینیکل ٹرائلز کیے جائیں گے