مہنگائی سنگل ڈیجٹ میں، معیشت بحالی کی جانب گامزن ہے، وزیر خزانہ

وزیر خزانہ سینیٹر محمد اورنگزیب نے امریکی اخبار یو ایس ٹوڈے کو دیے گئے انٹرویو میں کہا ہے کہ ملک میں مہنگائی 38 فیصد سے کم ہو کر سنگل ڈیجٹ میں آ چکی ہے، جبکہ زرمبادلہ کے ذخائر ساڑھے چودہ ارب ڈالر سے تجاوز کر گئے ہیں۔

انہوں نے کہا کہ پرائمری بجٹ اور کرنٹ اکاؤنٹ سرپلس کا حصول ایک اہم سنگ میل ہے۔ شرح مبادلہ میں استحکام سے سرمایہ کاروں کا اعتماد بحال ہوا ہے، تاہم 2.7 فیصد معاشی نمو مثبت ہونے کے باوجود ناکافی ہے۔ ان کے مطابق ٹیکس، توانائی اور سرکاری اداروں میں اصلاحات کا عمل جاری ہے۔

وزیر خزانہ کا کہنا تھا کہ آئی ٹی برآمدات چار ارب ڈالر سے تجاوز کر چکی ہیں اور آئندہ پانچ سال میں ان کے دوگنا ہونے کا امکان ہے۔ نجکاری اور ٹیرف اصلاحات سے عالمی مسابقت میں اضافہ ہوگا، جبکہ عالمی بینک کے مطابق پاکستان میں ایسٹ ایشیا طرز کی ترقی کا امکان موجود ہے۔

محمد اورنگزیب نے خواتین کی تعلیم اور لیبر فورس میں شمولیت کو ناگزیر قرار دیا اور کہا کہ موسمیاتی تبدیلی جیسے بڑے چیلنجز سے نمٹنے کے لیے عالمی تعاون ضروری ہے۔ انہوں نے بتایا کہ زراعت، معدنیات اور ڈیجیٹل معیشت میں سرمایہ کاری کے وسیع مواقع موجود ہیں، جبکہ بلوچستان کا ٹیتھیان کاپر بیلٹ عالمی توجہ کا مرکز بن رہا ہے۔ ڈیٹا سینٹرز، اے آئی اور ڈیجیٹل سروسز میں بھی بڑی صلاحیت موجود ہے۔

انہوں نے کہا کہ پاکستان تجارت اور سرمایہ کاری کے لیے تیار ہے اور ملک بحران سے نکل کر مواقع کی معیشت کی جانب سفر کا آغاز کر چکا ہے۔ امریکی اخبار یو ایس ٹوڈے نے اس موقع پر پاکستان پر ایک خصوصی رپورٹ بھی شائع کی ہے۔