سمگلنگ کی روک تھام کے نتیجے میں گزشتہ سال کے مقابلے میں محصولات میں اضافہ
Web Desk
19 December 2025
اسلام آباد: وزیراعظم محمد شہباز شریف کی زیرِ صدارت ایف بی آر کی کارکردگی کے حوالے سے ہفتہ وار جائزہ اجلاس منعقد ہوا، جس میں انسدادِ سمگلنگ اقدامات، ٹیکس وصولیوں اور دیگر اہم امور پر تفصیلی بریفنگ دی گئی۔
اجلاس کے دوران وزیراعظم کو ایف بی آر کی جانب سے سمگلنگ کے خلاف جاری کارروائیوں اور ان کے مثبت نتائج سے آگاہ کیا گیا۔ وزیراعظم نے انسدادِ سمگلنگ کی کامیاب کارروائیوں پر ایف بی آر اور پاکستان کسٹمز کی کارکردگی کو سراہتے ہوئے کہا کہ ہر سال قوم کا اربوں روپے کا قیمتی سرمایہ سمگلنگ کی نذر ہو جاتا ہے، جس کی روک تھام ناگزیر ہے۔
وزیراعظم نے کہا کہ پاکستان کسٹمز کی مؤثر کارروائیوں کے نتیجے میں سمگلنگ میں خاطر خواہ کمی آنا قابلِ ستائش ہے، جبکہ سمگلنگ کی روک تھام سے متعدد اشیاء اب قانونی طور پر درآمد ہو کر معیشت کا باقاعدہ حصہ بن رہی ہیں۔
اجلاس میں وزیراعظم نے ٹیکس چوری کے خلاف اقدامات مزید تیز کرنے کی ہدایت دیتے ہوئے واضح کیا کہ ٹیکس چوری اور سمگلنگ کے خلاف کسی قسم کی نرمی نہیں برتی جائے گی۔ انہوں نے صوبائی حکومتوں کو غیر قانونی پیٹرول پمپس کے خلاف قانونی کارروائیوں میں ایف بی آر کے ساتھ مکمل تعاون کی بھی ہدایت کی۔
بریفنگ میں بتایا گیا کہ سمگلنگ کی روک تھام کے لیے پورے ملک میں کسٹمز کا مربوط نظام نافذ کیا جا چکا ہے۔ راہگزر ایپ کے ذریعے ملک بھر میں پیٹرول پمپس کی رجسٹریشن مکمل کر لی گئی ہے اور غیر قانونی پمپس کے خلاف کارروائیاں جاری ہیں۔ نئے پیٹرولیم ایکٹ کے تحت ضلعی انتظامیہ کو غیر قانونی مشینری ضبط کرنے کا اختیار دیا گیا ہے جبکہ پیٹرولیم مصنوعات کی دورانِ نقل و حمل جی پی ایس ٹریکنگ کا نظام بھی نافذ العمل ہے۔
اجلاس کو بتایا گیا کہ جولائی سے نومبر 2025 کے دوران پیٹرولیم مصنوعات کی سمگلنگ کی روک تھام کے نتیجے میں گزشتہ سال کے مقابلے میں محصولات میں 82 فیصد اضافہ ہوا۔ گزشتہ پانچ ماہ میں سگریٹ، ٹائرز، کپڑے، الیکٹرانکس اور دیگر مصنوعات کی غیر قانونی سمگلنگ کے خلاف اقدامات سے بھی محصولات میں نمایاں اضافہ ریکارڈ کیا گیا۔
اجلاس میں وفاقی وزراء محمد اورنگزیب، احد خان چیمہ، وزیرِ مملکت برائے خزانہ بلال اظہر کیانی، چیئرمین ایف بی آر اور متعلقہ اداروں کے اعلیٰ افسران نے شرکت کی۔
متعلقہ عنوانات
اسحاق ڈار سے ترکمانی وزیر خارجہ کی ملاقات، زیرِ التوا مسائل کے حل پر زور
17 November 2026
فیلڈ مارشل سے ایرانی وزیر خارجہ کی ملاقات، قریبی روابط اور تعاون پر اتفاق
17 November 2026
مال گاڑی کو حادثہ، انجن سمیت 5 بوگیاں پٹری سے اتر گئیں
17 November 2026
عمران خان کو سرجری کی ضرورت ہے تو حکومت سہولت فراہم کرے گی: رانا ثنا اللہ
17 November 2026
ایران کا آبنائے ہرمز کے قریب امریکی ڈرون قبضے میں لینے کا دعویٰ
17 November 2026
لاہور: مدرسے میں تاخیر سے پہنچنے پر قاری کا طالبعلم پر تشدد
17 November 2026
باب المندب سے فورسز کا انخلا، سعودیہ نے اتحادی فوج کا کمانڈر بدل دیا
17 November 2026
حکومت اور جماعت اسلامی کے مذاکرات کا آخری دور 19 نومبر کو ہوگا: لیاقت بلوچ
17 November 2026