کراچی میں سردی بڑھنے سے سانس کے امراض میں اضافہ

کراچی: شہر میں سردی بڑھنے کے باعث سانس کے امراض میں تشویشناک اضافہ دیکھا جا رہا ہے۔ پاکستان پیڈیاٹرکس ایسوسی ایشن کے صدر کے مطابق خشک سردی کی وجہ سے بچوں میں نمونیا اور سانس کی نالی کے انفیکشن کے کیسز بڑھ رہے ہیں۔

انہوں نے بتایا کہ او پی ڈی میں روزانہ آنے والے بچوں کی تعداد 60 فیصد سے تجاوز کر چکی ہے، جبکہ 20 سے 30 فیصد بچوں کو حالت تشویشناک ہونے پر ہسپتال میں داخل کرنا پڑ رہا ہے۔

ان کا کہنا تھا کہ ماحولیاتی آلودگی بھی بچوں کی صحت کے مسائل میں اضافے کا سبب بن رہی ہے۔ والدین بچوں کو گرم کپڑے پہنائیں، سرد ہوا سے محفوظ رکھیں اور دھول، دھوئیں و آلودہ ماحول سے دور رکھیں۔

واضح رہے کہ کراچی میں آج کم سے کم درجہ حرارت 6 ڈگری سینٹی گریڈ ریکارڈ کیا گیا ہے۔