کراچی میں پہلے ڈیجیٹل ہیلتھ سینٹر کا افتتاح

وفاقی وزیرِ صحت سید مصطفیٰ کمال نے فیڈرل گورنمنٹ ڈسپینسری سول ایوی ایشن میں شہر کے پہلے ڈیجیٹل ہیلتھ سینٹر کا افتتاح کر دیا۔ اس جدید مرکز میں مریضوں کا علاج ٹیلی میڈیسن کے ذریعے کیا جائے گا، جہاں بیرونِ ملک موجود ماہر ڈاکٹر لائیو ویڈیو کال کے ذریعے مریضوں کا معائنہ کر سکیں گے۔

ڈیجیٹل ہیلتھ سینٹر میں آنے والے مریضوں کو مفت ادویات بھی فراہم کی جائیں گی۔ یہ سہولت خاص طور پر چھاتی، جگر اور پھیپھڑوں کے کینسر جیسے پیچیدہ امراض میں مبتلا مریضوں کے لیے نہایت اہم قرار دی جا رہی ہے۔

افتتاحی تقریب سے خطاب کرتے ہوئے وزیرِ صحت نے کہا کہ اس اقدام کا مقصد بڑے اسپتالوں پر دباؤ کم کرنا اور عوام کو گھر کے قریب معیاری طبی سہولیات فراہم کرنا ہے۔ انہوں نے کہا کہ پاکستان اس وقت مریض بنانے کی فیکٹری بن چکا ہے، جہاں معمولی بیماریوں کے لیے بھی بڑے اسپتالوں کا رخ کیا جاتا ہے، جس سے نظامِ صحت پر غیر ضروری بوجھ پڑتا ہے۔

سید مصطفیٰ کمال نے بتایا کہ حکومت بنیادی صحت کے مراکز کو مضبوط بنا رہی ہے تاکہ عوام کو قریبی سطح پر بہتر علاج میسر ہو۔ ان کا کہنا تھا کہ یہ کراچی کا پہلا ڈیجیٹل ہیلتھ سینٹر ہے اور آئندہ مرحلے میں ملک بھر میں ایسے مزید مراکز قائم کیے جائیں گے۔

وزیرِ صحت نے ویکسینیشن اور پرائمری کیئر کی اہمیت پر زور دیتے ہوئے بتایا کہ گزشتہ روز ایک منصوبے پر دستخط کیے گئے ہیں، جس کے تحت اسلام آباد میں چھاتی، جگر اور پھیپھڑوں کے کینسر کے 745 مریضوں کو 98 لاکھ روپے مالیت کی ادویات فراہم کی جائیں گی۔