2025 میں پی آئی سی پاکستان کے امراضِ قلب کے بڑے ہسپتالوں میں سرفہرست

پشاور انسٹیٹیوٹ آف کارڈیالوجی (پی آئی سی) سال 2025 میں پاکستان کے بڑے امراضِ قلب کے ہسپتالوں کی فہرست میں سرفہرست رہا۔ پی آئی سی نے ایک سال کے دوران 2 ہزار 538 دل کے آپریشن کیے، جن میں 316 بچوں کی اوپن ہارٹ سرجریز بھی شامل ہیں۔

ترجمان پی آئی سی رفعت انجم کے مطابق او پی ڈی میں ایک لاکھ 27 ہزار 748 دل کے مریضوں کا معائنہ کیا گیا، جن میں 22 ہزار 563 بچے شامل تھے۔ سال 2025 کے دوران 19 ہزار 583 مریضوں کی انجیوگرافی اور انجیوپلاسٹی کی گئیں جبکہ ایک ہزار 222 بچوں کے دل کے سوراخ ڈیوائس کے ذریعے بند کیے گئے۔

ترجمان نے بتایا کہ ایمرجنسی میں 23 ہزار 101 دل کے مریضوں کو طبی امداد فراہم کی گئی جبکہ صحت کارڈ کے تحت 28 ہزار 115 مریضوں کو مفت انجیوگرافی، انجیوپلاسٹی، دل کے آپریشنز اور دیگر علاج کی سہولیات دی گئیں۔

پی آئی سی میں جدید طبی سہولیات کے تحت بغیر سینہ چاک کیے 37 ٹاوی اور 3 مائٹرل کلپ سرجریز بھی کی گئیں۔ ہسپتال میں دیگر صوبوں کے علاوہ پڑوسی ملک افغانستان کے مریضوں کو بھی علاج کی سہولت فراہم کی گئی، جہاں تقریباً 1200 افغان مریضوں کا او پی ڈی میں علاج اور 200 سے زائد کی انجیوگرافی، انجیوپلاسٹی اور دل کی سرجریز کی گئیں۔

سال 2025 میں پی آئی سی نے ایک دن میں 14 ٹاوی سرجریز کرکے عالمی ریکارڈ بھی قائم کیا، جو پاکستان کے لیے ایک بڑا اعزاز قرار دیا جا رہا ہے۔