گردوں کی صحت کے لیے پانی پینا ضروری، ڈی ہائیڈریشن گردوں کو نقصان پہنچا سکتی ہے

گردوں کے امراض بہت تکلیف دہ ہوتے ہیں اور دنیا بھر میں کروڑوں افراد کو ان کا سامنا ہوتا ہے۔

گردے خون کو فلٹر کرتے ہیں اور زہریلے مواد اور اضافی سیال کو جسم سے خارج کرتے ہیں جبکہ پوٹاشیم، سوڈیم اور دیگر اجزا کی سطح کو متوازن رکھتے ہیں۔ اس کے علاوہ گردے ہارمونز بھی بناتے ہیں جو بلڈ پریشر اور ہڈیوں کی مضبوطی میں اہم کردار ادا کرتے ہیں۔تخمینہ لگایا گیا ہے کہ دنیا میں ہر 10 میں سے ایک فرد کو گردوں کے دائمی امراض کا سامنا ہے، جس کی وجہ سے سیال اور دیگر مواد جسم میں جمع ہونے لگتے ہیں۔ اس حوالے سے اکثر کہا جاتا ہے کہ پانی کم پینا گردوں کے امراض کا باعث بن سکتا ہے، اور یہ بات بالکل درست ہے۔گردوں کی اچھی صحت کے لیے روزانہ 2 سے 3 لیٹر (8 سے 12 گلاس) پانی پینا ضروری ہے۔ پانی خون کی شریانوں کو کشادہ رکھتا ہے، غذائی اجزا کو گردوں تک پہنچاتا ہے، اور زہریلے مواد کو جسم سے خارج کرتا ہے۔جب جسم پانی کی کمی کا شکار ہوتا ہے تو گردوں تک اجزا کی رسائی مشکل ہو جاتی ہے اور گردوں کے افعال متاثر ہوتے ہیں۔ پانی کی کمی سے گردوں کی پتھری، پیشاب کی نالی میں سوزش، اور دیگر مسائل پیدا ہو سکتے ہیں۔ مناسب مقدار میں پانی پینے سے گردوں کی بیماریوں اور پتھری کے خطرات نمایاں حد تک کم ہو جاتے ہیں۔پیشاب کی رنگت سے بھی جسم میں پانی کی کمی کا اندازہ لگایا جا سکتا ہے۔ شفاف یا ہلکی زرد رنگت صحت مند گردوں اور مناسب پانی کی مقدار کی نشانی ہے، جبکہ گہری رنگت پانی پینے کی ضرورت کی علامت ہے۔ماہرین کے مطابق اگر جسم میں پانی کی کمی ہو تو بلڈ پریشر کم ہوتا ہے اور گردوں کی جانب خون کی گردش متاثر ہوتی ہے، اس لیے مناسب مقدار میں پانی پینا عادت بنانا انتہائی ضروری ہے۔

البتہ اگر آپ گردوں کے امراض کے شکار ہیں تو پانی کی مقدار محدود کرنے کے لیے ڈاکٹر سے مشورہ کریں۔