صبح آنکھ کھلتے ہی موبائل دیکھنے کی عادت صحت کے لیے نقصان دہ

موجودہ دور میں ٹیکنالوجی کے بڑھتے ہوئے رجحان نے جہاں زندگی سہل بنائی ہے، وہیں موبائل فون کے بے جا استعمال نے انسانی صحت کے لیے نئے خطرات پیدا کر دیے ہیں۔ حالیہ سروے رپورٹس کے مطابق تقریباً 84 فیصد صارفین صبح بیدار ہونے کے محض 15 منٹ کے اندر اپنا فون چیک کرنا شروع کر دیتے ہیں۔ ماہرینِ صحت نے اس عادت کو انسانی دماغ کے لیے انتہائی نقصان دہ قرار دیتے ہوئے خبردار کیا ہے کہ یہ عمل ذہنی دباؤ اور دن بھر کی تھکن کا باعث بنتا ہے۔

تحقیق کے مطابق انسانی دماغ بیداری کے وقت بتدریج ‘ڈیلٹا’ سے ‘الفا’ اور پھر ‘بیٹا’ اسٹیٹ (مکمل فعال حالت) میں منتقل ہوتا ہے۔ جب کوئی شخص آنکھ کھلتے ہی اسکرین دیکھتا ہے تو دماغ کو سکون کی حالت سے اچانک انتہائی متحرک حالت میں جانا پڑتا ہے، جس سے اعصابی نظام پر دباؤ بڑھتا ہے اور انسان چڑچڑے پن یا بے چینی کا شکار ہو جاتا ہے۔ ماہرین کا مشورہ ہے کہ ذہنی توازن برقرار رکھنے کے لیے بیدار ہونے کے بعد کم از کم ایک گھنٹہ فون سے دوری اختیار کرنی چاہیے تاکہ دماغ قدرتی طور پر فعال ہو سکے۔ اسی طرح سونے سے قبل موبائل کا استعمال بھی نیند کے قدرتی چکر کو متاثر کر کے کئی جسمانی مسائل کو جنم دے رہا ہے۔