غیر ملکیوں کو گردے فروخت کرنے والے گینگ کیخلاف شہری کے اغوا کا مقدمہ درج

پنجاب میں انسانی اعضا کی غیر قانونی پیوند کاری اور غیر ملکیوں کو گردے فروخت کرنے والے ایک خطرناک گینگ کے خلاف پولیس نے شکنجہ کس دیا ہے۔ ایک شہری کے اغوا اور اس کے اعضا نکالنے کی کوشش کے الزام میں باقاعدہ مقدمہ درج کر لیا گیا ہے جس میں پنجاب ہیومن آرگن ٹرانسپلانٹ ایکٹ کی سنگین دفعات شامل کی گئی ہیں۔

پولیس نے کارروائی کرتے ہوئے نرس فردوس خالد اور سہیل شمیم کو گرفتار کر لیا ہے۔ نرس کو جوڈیشل ریمانڈ پر جیل منتقل کر دیا گیا ہے جبکہ سہیل شمیم سے جسمانی ریمانڈ کے تحت تفتیش جاری ہے۔
متاثرہ شہری ارسلان کا عدالت میں دفعہ 164 کے تحت بیان قلمبند کر لیا گیا ہے، جس میں اس نے گینگ کے ہاتھوں اغوا ہونے اور پیش آنے والے واقعات کی تصدیق کی ہے۔
پنجاب ہیومن آرگن ٹرانسپلانٹ اتھارٹی کی سفارش پر مقدمے میں دفعہ 10، 11 اور 12 شامل کی گئی ہیں جو غیر قانونی پیوند کاری سے متعلق ہیں۔
پولیس ڈاکٹر فاروق، حاجی شہزاد، نواب خان اور علی خان سمیت 5 نامعلوم ملزمان کی گرفتاری کے لیے مختلف مقامات پر چھاپے مار رہی ہے۔
حکام کا کہنا ہے کہ یہ گینگ سادہ لوح شہریوں کو اغوا کر کے یا پیسوں کا لالچ دے کر ان کے گردے نکالتا تھا اور بھاری رقم کے عوض غیر ملکیوں کو فروخت کرتا تھا۔