میڈیکل کے طلبہ کے لیے بڑی خبر: اسلام آباد ہائی کورٹ نے نجی میڈیکل کالجز کو 18 لاکھ روپے سے زائد سالانہ فیس کی وصولی سے روک دیا

اسلام آباد: اسلام آباد ہائی کورٹ کے جسٹس ارباب محمد طاہر نے نجی میڈیکل کالجز کی جانب سے لی جانے والی اضافی فیسوں کے خلاف دائر درخواست پر سماعت کی۔ یہ درخواست رفاہ میڈیکل کالج کی سیکنڈ ایئر کی طالبہ یمنیٰ یاسر کی جانب سے دائر کی گئی تھی، جس میں موقف اختیار کیا گیا کہ کالج انتظامیہ پی ایم ڈی سی کے احکامات کی کھلم کھلا خلاف ورزی کر رہی ہے۔

درخواست گزار کے وکیل شفقت عباس تارڑ ایڈووکیٹ نے عدالت کو بتایا کہ پی ایم ڈی سی نے نجی میڈیکل کالجز کے لیے سالانہ فیس کی حد 18 لاکھ روپے مقرر کر رکھی ہے، تاہم کالج انتظامیہ نے طالبہ کو 24 لاکھ روپے کا چالان بھیج دیا ہے، جو کہ غیر قانونی ہے۔ وکیل نے مزید بتایا کہ کالج انتظامیہ کو اس حوالے سے درخواست بھی دی گئی لیکن انہوں نے اضافی فیس کی وصولی کا فیصلہ واپس نہیں لیا۔

عدالت نے دلائل سننے کے بعد نجی کالج انتظامیہ کو آئندہ سماعت تک 18 لاکھ سے زائد فیس وصول کرنے سے روک دیا ہے۔ ہائی کورٹ نے اس معاملے پر وفاقی حکومت، پی ایم ڈی سی اور کالج انتظامیہ کو نوٹس جاری کرتے ہوئے تحریری جواب طلب کر لیا ہے۔ اس فیصلے سے ان ہزاروں طلبہ کو ریلیف ملنے کی توقع ہے جو نجی میڈیکل کالجز کی بھاری فیسوں کے بوجھ تلے دبے ہوئے ہیں۔