برطانیہ: فلاحی اداروں کیلئے عطیہ جمع کرنیوالے بے گھر پیانسٹ کو بالآخر گھر مل گیا

لندن: ایک باصلاحیت بے گھر پیانسٹ، جو ایک دہائی سے زائد عرصے تک سڑکوں پر زندگی گزارنے کے باوجود موسیقی سے جڑا رہا اور اپنی پرفارمنس کے ذریعے مختلف فلاحی اداروں کے لیے تقریباً 40 ہزار پاؤنڈ جمع کرچکا ہے، بالآخر اپنے مستقل گھر میں منتقل ہوگیا۔

34 سالہ رائس وِن جونز اس وقت ایک چرچ پہنچے تھے جب وہ سڑکوں پر زندگی گزار رہے تھے۔ انہوں نے چرچ انتظامیہ سے درخواست کی کہ کیا وہ وہاں پیانو بجا سکتے ہیں۔ رائس کے مطابق موسیقی اور پیانو بجانا انہیں ذہنی دباؤ سے نمٹنے اور پرسکون رہنے میں مدد دیتا ہے۔

چرچ میں اس رات ان کی پرفارمنس کے اختتام پر حاضرین نے کھڑے ہوکر انہیں داد دی۔ اس کے بعد بھی رائس نے مشکل حالات کے باوجود موسیقی کا سفر جاری رکھا اور مختلف مواقع پر اپنی شاندار پرفارمنس سے لوگوں کو متاثر کیا۔

اپنی موسیقی کے باعث وہ بعد ازاں ’’دی نائٹ چرچ پیانسٹ‘‘ کے نام سے بھی مشہور ہوگئے۔ گزشتہ برس انہیں پرائیڈ آف برٹین ایوارڈز میں شرکت کا موقع ملا، جہاں ان کی ملاقات مختلف معروف شخصیات سے ہوئی۔

رائس کی موسیقی نے مختلف فلاحی اداروں کے لیے تقریباً 40 ہزار پاؤنڈ جمع کرنے میں بھی اہم کردار ادا کیا۔

رائس ماضی میں برطانوی فوج میں بھی خدمات انجام دے چکے ہیں۔ اب ان کی زندگی نے ایک نیا موڑ لیا ہے اور وہ مغربی کارن وال میں کوسٹ لائن ہاؤسنگ کے زیر انتظام ایک نئے رہائشی منصوبے میں منتقل ہوگئے ہیں، جہاں انہیں بالآخر ایک مستقل گھر اور محفوظ ٹھکانہ مل گیا ہے۔

دہائیوں پر محیط مشکلات کے بعد رائس کی نئی زندگی کا آغاز امید، موسیقی اور مستقل گھر کے ساتھ ہوا ہے