ہیپاٹائٹس سی کی زیرِ آزمائش دوا سے متعلق انکشاف

بیجنگ/بوخم: طبی ماہرین نے ایک نئی تحقیق میں انکشاف کیا ہے کہ ہیپاٹائٹس سی کے علاج کے لیے زیرِ آزمائش ایک دوا ہیپاٹائٹس ای وائرس (HEV) کے پھیلاؤ کو روکنے میں بھی انتہائی معاون ثابت ہو سکتی ہے۔ یہ دریافت ایک ایسے وقت میں سامنے آئی ہے جب دنیا بھر میں ہر سال تقریباً 70 ہزار افراد اس مرض کے باعث جان کی بازی ہار جاتے ہیں، اور اب تک اس کے خلاف کوئی مخصوص ویکسین یا دوا دستیاب نہیں تھی۔

جرمنی کے شہروں بوخم اور ہائیڈل برگ سمیت چین کے دارالحکومت بیجنگ کے ماہرین پر مشتمل بین الاقوامی ٹیم نے ’بمنفوسبوویر‘ (Bemnifosbuvir) نامی مرکب کی نشاندہی کی ہے۔ یہ مرکب نیوکلیوٹائیڈ اینالاگ ادویات کے گروپ سے تعلق رکھتا ہے اور تجربات کے دوران ہیپاٹائٹس ای وائرس کے خلاف مؤثر پایا گیا ہے۔ چونکہ یہ دوا پہلے ہی ہیپاٹائٹس سی کے کلینیکل ٹرائلز کے مراحل میں ہے، اس لیے ماہرین پرامید ہیں کہ اسے بہت جلد ہیپاٹائٹس ای کے باقاعدہ علاج کے طور پر منظور کرایا جا سکے گا۔

6 مارچ 2026 کو معروف طبی جریدے ’گٹ‘ (Gut) میں شائع ہونے والی اس رپورٹ کو ماہرینِ صحت ایک بڑی کامیابی قرار دے رہے ہیں۔ سائنس دانوں کا ماننا ہے کہ اگر مزید انسانی آزمائشیں کامیاب رہیں، تو یہ دریافت مستقبل قریب میں لاکھوں مریضوں کے لیے زندگی بچانے کا ذریعہ بنے گی۔ ہیپاٹائٹس ای خاص طور پر ترقی پذیر ممالک میں صاف پانی کی عدم دستیابی کے باعث تیزی سے پھیلتا ہے، جہاں یہ دریافت گیم چینجر ثابت ہو سکتی ہے۔