جوان افراد میں ہارٹ اٹیک کی شرح میں اضافے کی اہم وجہ دریافت

نئی تحقیقی رپورٹس کے مطابق نوجوان افراد میں Heart Attack کی شرح میں تشویشناک اضافہ دیکھنے میں آیا ہے، خاص طور پر 20 سے 50 سال کی عمر کے افراد زیادہ متاثر ہو رہے ہیں۔

ماہرین کے مطابق جہاں بڑی عمر کے افراد میں دل کے دورے کی شرح کم ہوئی ہے، وہیں نوجوانوں میں اس میں اضافہ ہوا ہے اور زیادہ تر افراد کو اس کی علامات کا بھی علم نہیں ہوتا۔تحقیق میں ایک بڑی وجہ Ultra-processed foods کا زیادہ استعمال قرار دیا گیا ہے۔ ان غذاؤں میں فاسٹ فوڈ، بیکری آئٹمز، میٹھے مشروبات، انسٹنٹ نوڈلز اور پیک شدہ اسنیکس شامل ہیں، جن میں نمک، چینی اور مصنوعی اجزاء زیادہ جبکہ فائبر کم ہوتا ہے۔University of Texas کی تحقیق کے مطابق ان غذاؤں کے زیادہ استعمال سے دل کے امراض، فالج اور موت کا خطرہ 67 فیصد تک بڑھ سکتا ہے، جبکہ ہر اضافی الٹرا پراسیس غذا کے استعمال سے خطرہ مزید 5 فیصد بڑھ جاتا ہے۔تحقیق میں 45 سے 84 سال کے 6,814 افراد کے ڈیٹا کا جائزہ لیا گیا، جو ابتدا میں دل کے امراض سے محفوظ تھے، تاہم وقت کے ساتھ ان کی غذائی عادات اور صحت کا تجزیہ کیا گیا۔ماہرین کا کہنا ہے کہ اگرچہ مزید تحقیق کی ضرورت ہے، مگر شواہد واضح کرتے ہیں کہ غیر صحت بخش خوراک دل کی بیماریوں کا بڑا سبب بن رہی ہے، اس لیے الٹرا پراسیس غذاؤں کا استعمال کم کرنا ہی بہتر ہے۔